Vielha, 17 de noveme de 2017.- Eth programa europèu de cooperacion transfronterèra entath desvolopament sostenible POCTEFA subvencionarà es projèctes TRANSGARONA e ENTREPYR II deth Conselh Generau d’Aran.
Eth Comitat de Programacion deth Programa de Cooperacion Territoriau Europèa INTERREG V-A (Espanha-França-Andòrra) POCTEFA corresponenta ath periòde 2014-2020 a acordat programar per un costat eth projècte TRANSGARONA que compartissen eth Conselh Generau d’Aran e eth Conseil Departemental Haute Garonne; e per d’aute eth projècte ENTREPYR ll qu’eth Conselh Generau i participe amassa damb era Federacion Aragonesa de Montanhisme, era Federacion d’Entitats Excursionistes de Catalonha (FEEC) e eth Govèrn d’Aragon per part espanhòla, amassa damb eth Parc Nacionau des Pyrénées, era Universitat de Toulouse III e era Federation Française des Clubs Alpins et de Montagne pera part francesa.
Eth projècte TRANSGARONA qu’eth Conselh Generau d’Aran i arreceberà ua subvencion de 813.689 €, consistís en projècte transfronterèr de Parcours Cyclable (rota ciclista) entà junher eth naishement der arriu Garona ena Val d’Aran e era ciutat de Toulouse, destinat entà favorir era mobilitat de bens e persones, en tot melhorar per exemple era aufèrta de transpòrt transfronterèr respectuós damb eth miei ambient que favorisque es desplaçaments tanti de persones coma de merces.
Damb aguesta subvencion eth Conselh Generau d’Aran abilitarà eth tram de Camin Reiau, separat dera N-230, que va des de Les enquiara frontèra damb França. enes pròplèus dies eth Conselh Generau a previst encargar eth projècte executiu.
Eth projècte ENTREPYR ll, damb ua subvencion de 97.500€ permeterà ath Conselh Generau d’Aran installar en dus refugis de montanha dera Val d’Aran dus banhs shuts e dus potabilizadores entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion des madeishes via web.
ENTREPYR ei un projècte que recuelh coma un des sòns objectius principaus arténher qu’es montanhencs caminen es refugis espanhòus, francesi e andorrans e era utilizacion des naues tecnologies enes refugis deth Pirenèu.
Eth conselhèr de Territòri d’Aran, José Antonio Boya, que participèc ena session deth Comitat de Programacion deth Programa de Cooperacion Territoriau Europèa INTERREG VA, se mostrèc fòrça satisfèt pes subvencions autrejades ath Conselh Generau d’Aran en aguesti projèctes europèus de grana envergadura, qu’ath delà meten en valor era bona sintonia de collaboracion damb es institucions franceses e permet contunhar en tot compartir projèctes transfronterès.
POCTEFA ei un programa europèu de cooperacion transfronterèra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e gestionadi per organismes publics e privadi d’ambdús costats des Pirenèus. Eth Programa se finance a trauès deth Hons Europèu de Desvolopament Regionau (FEDER).
