• Era sindica d’Aran a anonciat aguest maitin, pendent er acte de celebracion de Santa Barbara, patrona des pompièrs, que dempús dera presentacion deth contenciós deth Conselh Generau d’Aran ara Generalitat de Catalunya per incompliment der acòrd institucionau tath desplegament deth sistèma integrau d’emergéncies d’Aran, es negociacions damb eth departament d’Interior an permetut qu’aguest transferisque 400.000 euros entar aqueriment de veïcles de besonh tath còs de pompièrs dera Val d’Aran
• Es Pompièrs d’Aran an celebrat aué era hèsta en aunor ara sua patrona, Santa Barbara, ua celebracion adaptada as naues circomstáncies sanitàries e ena qu’era sindica d’Aran a volut arregraïr ath còs de pompièrs e pompières eth sòn trabalh e eth sòn compromís damb Aran e era sua gent

Eth còs de Pompièrs deth Conselh Generau d’Aran a celebrat aué, 4 de deseme, era hèsta dera sua patrona, Santa Barbara, en ua cerimònia adaptada ara situacion sanitària e era naua normalitat.

Auanci en nau modèl de gestion integrau des emergéncies en Aran

Pendent aguest acte, era sindica d’Aran, Maria Vergés, a destacat eth trabalh amiat a tèrme deth Conselh Generau d’Aran en marc deth desplegament deth nau modèl de gestion integrau des emergéncies ena Val d’Aran. En aguest sens, era sindica explicaue que: “en matèria laborau, deth govèrn d’Aran estant s’an amiat a tèrme es procèssi selectius entà corbir es diuèrses places que se contemplen en nau modèl, se trabalhe ena regulacion deth marc laborau des pompièrs volontaris qu’a de balhar-les seguretat laborau e juridica, e auem aprobat tanben era creacion e foncionament des borses de trabalh dera societat Pompièrs-Emergéncies SL”.

En çò que tanh a infraestructures e equipament, Vergés afirmaue que: “auem auançat, e lèu finalizat, eth procès d’implementacion dera sala centrau Joan Canalias, plaçada en Casau e que supausarà ua melhora substanciau dera efectivitat ena gestion des emergéncies, atau madeish, enguan eth Conselh Generau d’Aran a artenhut auer un elicoptèr pròpri pendent sies mesi, un auanç en matèria de rescats de montanha e en quau trabalham entà que sigue ua realitat pendent tot er an e, per un aute costat, auem aquerit dues naues ambulàncies qu’an arribat aguesta madeisha setmana e diuèrsi equips de proteccion individuaus entàs nòsti efectius”.

Era sindica d’Aran a volut destacar es trabalhs amiadi a tèrme per Pompièrs Emergéncies S.L tà que “per prumèr viatge, era Val d’Aran compde damb un Plan Estrategic tara gestion sostenible deth regim deth huec, que darà responsa as naui scenaris de cambi climatic e escalada enes generacions d’incendis. Un Plan pionèr e que cree un marc de trabalh transversau e de consens territoriau per çò que hè ar emplec deth huec, balhant esturments as gestors des emergéncies en Aran”.

Conflicte per Acòrd Institucionau de gestion integrau d’emergéncies en territòri

D’un aute costat, pendent era sua intervencion, era sindica a hèt referéncia ara problematica sorgida entre eth Conselh Generau d’Aran e eth Departament d’Interior dera Generalitat pr’amor der incompliment der Acòrd Institucionau de gestion integrau d’emergéncies en territòri per part der executiu catalan, que supausèc era interposicion per part dera maxima institucion aranesa d’un recors administratiu contenciós.

En aguest sens, Vergés afirmaue: “era volentat deth Conselh Generau a estat tostemp era de trapar vies de solucion ad aguest conflicte basades ena leiautat e eth respècte institucionau, per aguest motiu, un còp constituït eth nau govèrn dera Generalitat, inicièrem ua naua negociacion damb era direccion generau de Prevencion, Extincion d’Incendis e Sauvaments qu’a permetut qu’aué poscam anonciar qu’aguest conflicte s’a resolut e qu’enes pròplèu setmanes, eth Conselh Generau receberà ua dotacion economica especifica entà poder aquerir es veïculs de besonh”.

En sòn discors, era sindica d’Aran a volut arregraïr “era vocacion, entrèga, esfòrç e coratge deth nòste còs de pompièrs e pompières, que representen un exemple tara nòsta ciutadania e que representen aguesti valors en tot èster ua des cares visibles dera nòsta institucion, eth Conselh Generau d’Aran; ua representacion qu’an mantengut tostemp damb dignitat e respècte”.