• Aué a auut lòc era amassada dera Comission Bilaterau entre eth Conselh Generau d’Aran e era Generalitat de Catalunya, a on eth govèrn d’Aran, dempús de mesi de negociacion, a artenhut eth compromís d’actualizar e consolidar era sua competéncia plea en matèria de lengua, atau e coma establís era Lei d’Aran

• Era Comission Bilaterau a aprovat tanben d’auti ahèrs relacionadi damb eth supòrt as esportistes aranesi, era melhora en matèria d’ordenacion deth territòri e urbanisme e era sanitat aranesa

Aguest maitin a auut lòc, ena sedença deth Conselh Generau d’Aran, era amassada dera Comission Bilaterau entre eth govèrn d’Aran e era Generalitat de Catalunya corresponenta a 2022, qu’a estat copresidida pera sindica d’Aran, Maria Vergés, e era conselhèra de Presidéncia, Laura Vilagrà, ena qu’an participat tanben eth conselhèr d’Economia e Promocion Economica, Juan Antonio Serrano, eth conselhèr de Territòri, Paisatge e Gestion ambientau, Francés Bruna, era conselhèra de Coneishement e Innovacion, Angelina Cases, e eth conselhèr d’Espòrts e Governacion, Amador Marqués, atau coma d’auti nauti cargues dera Generalitat.

“Dempús de quauqui mesi de negociacions damb era Generalitat, eth govèrn deth Conselh Generau d’Aran a artenhut eth compromís deth govèrn catalan entara melhora des recorsi tar aranés” afirmaue era sindica d’Aran, en tot híger que: “auem acordat qu’enguan eth Conselh Generau d’Aran receberà 200.000 euròs mès entar aranés e auem artenhut eth compromís dera Generalitat entà que, ath long d’aguest 2023, s’establiquen es mecanismes entà qu’eth Conselh pogue desvolopar es sues competéncies e se pogue barrar definitivament eth finançament de besonh”.

Atau madeish, era sindica d’Aran a volut “arregraïr aguest prumèr gest dera Generalitat que servís entà daurir de manèra definitiva era negociacion qu’auem de barrar aguest 2023 entà consolidar eth traspàs en matèria de lengua, quauquarren qu’auem reclamat tot aguest temps”.

D’auti acòrds as qu’a arribat aguesta Comission Bilaterau an estat era melhora des recorsi en matèria d’ordenacion deth territòri e urbanisme, qu’an de perméter melhorar eth servici tecnic de supòrt as municipis e que “ei tanben er inici des trabalhs entà arténher mès competéncies en aguesti ambits tà poder hèr front as rèptes coma eth der accès ar abitatge”.

Aué tanben s’a aprovat eth pagament des ajuts per valor de 30.000 euròs tàs esportistes aranesi que formen part deth CETEI dera Val d’Aran, s’a ratificat eth convèni entre eth Departament de Salut dera Generalitat e eth Conselh Generau, e s’a aprovat era incorporacion des recorsi deth traspàs de competéncies en airau d’emergéncies ath Hons de Finançament Incondicionat, pr’amor que, der 1 de gèr de 2023 ençà, era competéncia en matèria de gestion d’emergéncies pertanh exclusivament ath govèrn aranés.

Atau madeish, era sindica d’Aran a metut de manifèst qu’aguest 2023 finalize er actuau acòrd de finançament entre andues institucions e ei de besonh començar a trabalhar en dessenh d’un nau acòrd que “permete ath Conselh Generau d’Aran tanben, ath delà d’actualizar es dotacions pressupostàries, recuperar es partides entà politiques pròpries que permeten era gestion e decision dirècta sus es accions e projèctes, e que se pogue establir eth mecanisme de contròl des acòrds financèrs” e, en aguest sens, era sindica d’Aran tanben a manifestat “eth besonh d’actualizar es inversions qu’era Generalitat amie a tèrme en Aran e, qu’enes darrèri 12 ans s’an plaçat en un -84%, quauquarren que demoram que pogue revertir-se damb era remodelacion der Espitau Val d’Aran, eth bastiment d’un centre culturau e de convencions o damb era ampliacion der actuau parc de Pompièrs de Vielha, atau coma damb d’autes politiques de competéncia dirècta dera Generalitat coma era melhora dera C-28”.

En aguesta amassada, s’a aprovat ua declaracion institucionau conjunta entre eth Conselh Generau e era Generalitat entath foment e proteccion der aranés, que remasse eth compromís dera Generalitat entà incrementar enguan aguesta transferéncia en matèria de lengua ath Conselh e ena que tanben andues institucions se comprometen a desvolopar pendent 2023 un procès conjunt entà determinar es besonhs de finançament entath foment e proteccion der aranés e a establir es mecanismes de besonh tà qu’eth Conselh Generau pogue desvolopar damb garanties era sua competéncia plea en aguesta matèria.