• Per prumèr còp eth Banc d’Aliments dera Val d’Aran aufrirà lòts de productes fresqui as lèu 180 familhes que depenen deth servici dempús der acòrd de collaboracion ath qu’a arribat eth Conselh Generau d’Aran damb es supermercats Caprabo e Mercadona e ath suport des donacions economiques de diuèrses entitats e persones pendent aguesti mesi de pandèmia

Eth Conselh Generau d’Aran met en foncionament enes pròplèu dies un nau servici en Banc d’Aliments entà dotar-lo setmanaument de productes fresqui entà repartir-les entre es familhes qu’en depenen.

Era sindica d’Aran, Maria Vergés, a volut manifestar eth sòn arregraïment damb es empreses Caprabo e Mercadona pera sua cooperacion damb eth Banc d’Aliments dera Val d’Aran, ja que “per prumèr còp auem artenhut dotar as familhes de lòts variables de productes fresqui segontes es sòns besonhs”.

Era infraestructura de besonh entà poder sauvar aguest tipe de productes s’a artenhut tanben gràcies ara cession per part de Mercadona d’un refrigerador que permet conservar-les en bon estat entà dempús hèr eth corresponent repartiment.

En aguest sens, era sindica d’Aran a volut destacar “er aument tant considerable de persones en situacion de vulnerabilitat que depenen d’aguest servici, pr’amor qu’abantes dera pandemia, eth Banc d’Aliments corbie es besonhs d’ues 40 familhes, en tot qu’ara an aumentat a lèu 180 familhes, ei a díder, ath torn de 500 persones”.

Cau destacar tanben que deth mes de març ençà an aumentat eth nombre de persones e entitats comprometudes damb aguest ahèr, de forma qu’an estat constants es donacions solidàries e actes benefics collectius entà ajudar as persones qu’ac an de besonh.