• Aguest maitin s’a amiat a tèrme en Refugi dera Artiga de Lin ua pròva pilòt entà testejar era connexion satelitau a trauès d’ua trucada ara Sala de Contròtle de Pompièrs-Emergéncies, en Casau
• Aguesta pròva pilòt s’enquadre laguens der acòrd entre era maxima institucion aranesa damb Mobile World Capital Barcelona, Hispasat, Arantec e Fondacion i2CAT, que siguec presentat eth passat mes de març en Mobile World Congress de Barcelona e represente eth prumèr pas entath desplegament de connectivitat satelitau de banda ampla en endrets de nauta montanha
• Aguesta tecnologia incidirà directament ena prestacion de servicis coma eth contròtle dera ramaderia, era monitorizacion deth clima e possibles lauegi, era gestion d’itineraris toristics o es actuacions des servicis d’emergéncies

Aguest maitin, Mobile World Capital Barcelona (MWCapital), Hispasat, Conselh Generau d’Aran e Arantec an presenat eth prumèr pilòt en marc der Airau 5G Aran, que permet dotar de connexion ath Refugi dera Artiga de Lin a trauès de tecnologia satelitau. Eth projècte a compdat tanben damb eth supòrt des impulsors dera estrategia Airau 5G en Aran: Generalitat de Catalunya, Fundació i2Cat, IDAPA, Deputacion de Lhèida e Cambra deth Comèrç de Lhèida.

Se tracte deth prumèr pas entath desplegament de connectivitat de banda ampla, que incidirà directament ena prestacion  servicis coma eth contròtle de ramaderia ena zòna, era monitorizacion deth clima e possibles lauegi, era gestion d’itineraris toristics o es actuacions des servicis d’emergéncies.

“Deth Conselh Generau d’Aran ençà èm comprometudi damb era apòsta pera innovacion e era retencion e atraccion deth talent joen, quauquarren que prebotjam a trauès deth nòste HUB d’innovacion rurau HèPic, per aguest motiu, celebram poder amiar a tèrme aguest projècte, que vedem coma ua grana oportunitat entath nòste territòri e que dejà trabalham entà aplicar en sectors clau coma son era ramaderia, era gestion des emergéncies o era atencion as persones, entre d’autes”, afirmaue era sindica d’Aran, Maria Vergés.

Pendent era presentacion, s’a amiat a tèrme ua pròva dera connexion per miei dera simulacion d’ua trucada d’emergencia. Açò a permetut establir ua comunicacion, autant per votz coma per video, damb era Sala de Contròtle de Pompièrs-Emergéncies en Casau.

En aguest sens, gràcies ara connexion satelitau qu’aufrís era antena de Hispasat, eth gestor deth refugi a pogut comunicar-se damb Pompièrs-Emergéncies. Abans deth desplegament satelitau, eth lòc non compdaue damb cobertura telefonica ne damb connexion en internet.

Eth refugi compdarà damb ua installacion damb es següentes caracteristiques:

• HotSpot Wifi laguens dera aubèrja que facilitarà era gestion der establiment e aufrirà connexion as usatgèrs.
• HotSpot Wifi en airau d’influéncia deth refugi que permeterà establir un punt segur d’emergéncies e proporcionar connexion as excursionistes entà consultar er estat des rotes.
• Interfon e webcam damb connexion dirècta damb eth numerò d’emergéncies 112.
• Punt d’accès de hilat inalambrica LoRa, tecnologia que permet era connexion de sensors e d’auti dispositius damb un manteniment e despena d’energia minima, en tot perméter atau diuèrses foncionalitats de solucions IoT promoigudes des deth Conselh, coma per exemple era monitorizacion deth bestiar o de persones damb dispositius interactius LoRa.

Eth pilòt ei eth resultat der acòrd signat entre MWCapital, Hispasat, Conselh Generau d’Aran e Arantec, en collaboracion damb era Generalitat de Catalunya, pendent eth Mobile World Congress 2022. Aguesta aliança ei un compromís peth desplegament de tecnologia satelitau en zònes de nauta montanha e eth desvolopament de projèctes pilòt de conectivitat intelligenta, aplicables as particularitats deth territòri e as sòns besonhs.

Ath delà, eth projècte s’enquadre laguens dera estrategia Airaus 5G, iniciatiua dera MWCapital, Generalitat de Catalunya e Fundació i2CAT, e mès concrètaments laguens der Airau 5G Aran, a on se somen es partners locaus Conselh Generau d’Aran, IDAPA, Diputació de Lleida e Cambra de Comerç de Lleida. Aguesta estrategia preten accelerar sectors estrategics entath conjunt de Catalunya, coma, per exemple, era mobilitat sostenible, era gestion ramadèra e der entorn rurau, era proteccion deth medi ambient e/o era atraccion deth torisme de qualitat e esportiu en entorns naturaus.