• Aguest projècte cerque dinamizar es refugis en tot fomentar eth coneishement sus er entorn, valors coma eth reciclatge e eth suenh ara natura, ath madeish viatge que cree lòcs de trabalh entara gent joena deth territòri pendent era sason d’ostiu

Pendent aguest ostiu, eth Conselh Generau d’Aran aufrirà activitats d’educacion ambientau enes refugis dera Bassa d’Oles e deth Plan Batalhèr, es activitats se realizarán en orari de 10:15 e 11:15 ena Bassa d’Oles e entàs 15:30 en Plan Batalhèr de deluns a dimenge.

“Aguesta ei ua forma de dinamizar es refugis que respon ara idèa deth govèrn d’Aran d’apostar per un futur sostenible e responsable damb eth miei ambient, ath madeish viatge que fomentam era contractacion de persones joenes pendent era sason d’ostiu”, afirmaue eth conselhèr de Territòri, Paisatge e Gestion Ambientau, Francés Bruna, en tot híger que: “aprofitar aguestes infraestructures coma centres d’educacion ambientau mos permet fomentar eth coneishement sus er entorn, valors coma eth reciclatge o er aprofitament e eth suenh ara natura”.

Entre es activitats que s’aufrissen i a talhèrs d’eco-idèes, talhèrs d’orientacion, formacion sus parpalhòles o gimcanes de rastres, entre d’autes. Era aportacion economica serà volontària, mès cau reservar via mail a educa.ambientau.aran@gmail.com. Eth maxim de persones per talhèr ei de 12 persones e calerà respectar es mesures preventives pr’amor dera COVID-19.

Entà conéisher er estat d’aucupacion deth parcatge de Bassa d’Oles, se pòt consultar eth portau digitau AparcAran o era app Guidaran.