• En aguesta madeisha linha, eth Conselh Generau d’Aran a editat era sua pròpia “Guida deth lenguatge inclusiu enes tèxtes administratius” en aranés, que se repartic entre es assistents d’aguesti corsi de formacion e que se harà a arribar tanben a toti es ajuntaments deth nòste territòri

Era setmana passada, eth personau deth Conselh Generau d’Aran assistic a ua formacion sus lenguatge inclusiu ena administracion, ua iniciativa der airau d’Igualtat dera maxima institucion aranesa. Era formacion siguec impartida pes sociolingüistes dera UdL Helena Torres e Sònia Mas.

En aguestes jornades, es professionaus dera administracion receberen airines entà hèr a servir un lenguatge que non discrimine a cap de persona en desvolopament des sues foncions e se heren diuèrsi exercicis practics entà méter en practica es coneishements aquerits.

En aguesta madeisha linha, eth Conselh Generau d’Aran a editat era su pròpia “Guida deth lenguatge inclusiu enes tèxtes administratius”, que se repartic tanben entre es persones assistentes ad aguesta formacion e que se harà a arribar tanben a toti es ajuntaments deth nòste territòri.

“Aguestes accions responen ar objectiu deth govèrn deth Conselh Generau d’Aran de prepausar formes entà utilizar un lenguatge inclusiu e non sexista ne discriminatòri damb cap de persona ena administracion, entà fomentar era igualtat. E ac hèm, per prumèr còp, ena nòsta lengua pròpia, er aranés, qu’ei tanben era oficiau ena administracion d’Aran”, manifestaue era sindica d’Aran, Maria Vergés, que remercaue era importància d’aguestes accions perque “en encastre dera igualtat, era lengua jògue un papèr fonamentau perque eth lenguatge ei er esturment de comunicacion entre es persones e ei intimament relacionat damb eth pensament e era vida sociau”.