• Aguest circuit de formacion, adreçat entà nauvengudi e nauvengudes, ei format per tres mòduls qu’aufrissen coneishements de lengua, mon laborau e coneishement der entorn, e qu’an coma objectiu dotar ad aguestes persones des esturments basics entà arténher era autonomia en sòn territòri d’acuelhuda

• Enguan, coma nauetat, s’introdusís era perspectiva de genre ena formacion

Eth departament d’Igualtat, Salut e Benèster deth Conselh Generau d’Aran a iniciat, un còp mès, eth circuit de formacion de prumèra acuelhuda entà nauvenguts ara Val d’Aran. Aguesta formacion cònste de tres mòduls diferents que reflectissen era realitat dera societat aranesa.

Aguesti mòduls aufriràn coneishements sus lengua, mon laborau (aguest mòdul ei organizat peth Servici Public d’Aucupacion de Catalonha, en collaboracion damb eth Conselh) e coneishement der entorn, damb er objectiu de dotar as persones nauvengudes des esturments basics entà arténher era autonomia en sòn territòri d’acuelhuda, en aguest cas, Aran.

Coma nauetat en aguest circuit de prumèra acuelhuda, enguan s’introdusís era perspectiva de genre ena formacion, a on s’aufriràn coneishements sus desigualtat, drets des hemnes o violéncia de genre, entre d’auti ahèrs.

“Aran a estat tostemp territòri d’acuelhuda e per aquerò consideram tant importants aguesti corsi de formacion, pr’amor que son un prumèr pas entà dar a conéisher eth nòste territòri e facilitar era integracion des ciutadans que vien d’auti endrets”, afirme era conselhèra d’Igualtat, Salut e Benèster, Maria Vergés, que hig que: “incorporar era perspectiva de genre en aguesta formacion ei un element clau tanben entara conscienciacion e prevencion dera violéncia de genre, un ahèr que volem trabalhar en toti es airaus”.