• Era sindica d’Aran a hèt entrèga dera màger distincion deth Conselh Generau d’Aran ara familha der aumenatjat, de qui a volut destacar era sua gran estima peth país, atau coma era sua trajectòria pendent vint ans ath capdeuant dera maxima institucion aranesa, en tot trabalhar damb leiautat e respècte a Aran, era sua ciutadania e eth sòn autogovèrn

Aguest meddia, ena sedença institucionau deth Conselh Generau d’Aran (era Casa deth Senhor d’Arròs), era sindica d’Aran, Maria Vergés, a hèt entrega dera medalha d’Aranés Illustre ara familha deth Mgfc. senhor Carlos Barrera, qui a estat reconeishut, a titol postum, damb era màger distincion qu’autrege era maxima institucion d’Aran.

“Deth govèrn deth Conselh Generau d’Aran auem volut celebrar diuèrsi actes en marc dera Hèsta d’Aran, profitant entà rendir aumenatge a diferents persones e entitats qu’an trabalhat entà hèr dera Val d’Aran un lòc melhor. Ac hérem en tot plaçar ua placa commemorativa en aunor a Joan Canalias ena Sala de Contròtle de Pompièrs Emergéncies, autrejant eth prèmi 17 de Junh ara Escòla Aranesa e ager condecorant ara doctora Caubet damb era Medalha d’Aunor deth Conselh” explicaue era sindica d’Aran, en tot híger que: “en marc d’aguesta Hèsta d’Aran non podíem deishar de celebrar aguest acte solemne entà autrejar eth reconeishement d’Aranés Illustre ath sindic Barrera, qui estec pendent 20 ans ath capdeuant dera maxima institucion aranesa, trabalhant peth ben comun d’Aran, era sua ciutadania e eth sòn autogovèrn”.

Eth titol d’Aranés Illustre ei era màger distincion qu’autrege eth Conselh Generau, atau e coma mèrque eth Reglament d’Aunors e Distincions dera maxima institucion aranesa, aprovat en darrèr Plen deth Conselh, que ditz que: “era concession deth titol d’Aranés/a Illustre/a sonque poderà requèir en aqueres persones que, en tot auer neishut ena Val d’Aran, agen destacat de forma extraordinària per qualitats e mèrits personaus o per servicis prestadi en benefici o aunor dera Val d’Aran qu’agen contribuït de forma indiscutibla ath ben public”.