• Entà celebrar era Hèsta d’Aran enguan eth Conselh Generau d’Aran a organizat un acte institucionau en qué s’amiarà a tèrme un reconeishement e arregraïment ara gent grana dera Val d’Aran, qu’a patit es efèctes e impacte dera pandemia de forma mès intensa

• Deman s’amiarà a tèrme un Plen extraordinari deth Conselh Generau d’Aran en qué s’aprovarà era declaracion institucionau qu’autrege aguest reconeishement e que serà copresidit pera sindica d’Aran e eth president dera Generalitat de Catalunya, que visite era maxima institucion aranesa

Eth govèrn deth Conselh Generau d’Aran a premanit entath pròplèu dijaus, 17 de junh, un acte institucionau, adaptat ara situacion epidemiologica, entà celebrar era Hèsta d’Aran, que commemòre enguan es 30 ans dera reinstauracion dera maxima institucion aranesa.

Era sindica d’Aran, Maria Vergés, afirme que “deth govèrn deth Conselh Generau d’Aran ençà volem reconéisher era actitud e empatia qu’a demostrat eth conjunt dera ciutadania dera Val d’Aran e, especiaument, era nòsta gent grana, a qui volem arregraïr era generositat, esfòrç e aportacion entà bastir era Val d’Aran qu’aué coneishem”.

Per aguest motiu, deman s’amiarà a tèrme un plen extraordinari deth Conselh Generau d’Aran, que serà copresidit peth president dera Generalitat de Catalunya, Pere Aragonès, entà aprobar era declaracion institucionau pera quau s’acòrde concedir aguest Prèmi 17 de Junh ara Residéncia Sant Antòni de Vielha e es casaus deth jubilat de Vielha e Mijaran e Bossòst.

En aguest sens, era sindica d’Aran a volut arregraïr “ath president dera Generalitat era sua visita ara Val d’Aran entà tractar ahèrs primordiaus entath nòste territòri e que s’emmèrque ena naua etapa des relacions bilateraus entre andús govèrns qu’ei de besonh iniciar”.

Pendent era celebracion deth 17 de junh, se presentarà eth vidèu commemoratiu d’aguesta Hèsta e des 30 ans d’autogovèrn aranés en qu’an participat representants des collectius e professionaus essenciaus actius pendent era crisi sanitària e se sauvarà ua menuta de silenci en memòria des victimes dera COVID-19 en Aran.

Ath delà der acte institucionau, eth govèrn deth Conselh Generau d’Aran a premanit tanben un seguit d’activitats culturaus e de léser dirigides a toti es publics e de franc:

• Deth 14 ath 16 de junh: visites guidades tara Casa deth Senhor d’Arròs en orari de maitin e tarde (entàs visites ei de besonh inscriuer-se en sindicatura@aran.org)
• Deth 15 ath 20 de junh: entrada liure ath Musèu dera Val d’Aran e ar Ecomusèu Çò de Joanchiquet, en orari de maitin e de tarde.
• 16 de junh entàs 18:30: inauguracion dera exposicion Conselh Generau d’Aran, 30 ans d’autogovèrn ena Glèisa de Mijaran.

17 de junh entàs 17:00: representacion der espectacle “Karoli, l’home roda” ena Plaça d’Aran (en cas de mau temps, se realizarà ena Sala Polivalenta de Vielha).