Pendent era jornada deth 4 de junhsèga s’a amiat a tèrme era clausura dera 12au Setmana Occitano Catalana, qu’ a agut lòc pendent eth 30 de junh e eth 4 de junhsèga. Enguan aguesta edicion d’aguest eveniment culturau a estat dedicat ath centenari dera mòrt der escrivan occitan Frederic Mistral.

Ena jornada iniciau, eth cap de Politica Lingüistica deth Conselh Generau d’Aran, Jusèp Loís Sans, aufric un recuelh des desparières publicacions que s’an editat enguan en aranés. Laguens d’aguest corròp de creacions, i trapam un conjunt de libres de tèxte entàs estudiants, més tanben romans, òbres de teatre, un diccionari occitan-catalan e diuèrsi comics entre d’auti. En totau ua quinzea de composicions que se pòden visualizar a traués dera naua plana de publicacions deth Conselh Generau d’Aran: publicacions.conselharan.org

Ath long dera setmana s’an amiat a tèrme desparières conferéncies entà aprigondir en aranés e er occitan referenciau, a cargue d’Aitor Carrera e Jordi Suils e sus era literatura occitana, a cargue de Jaime Figueras e Jacme Taupiac. Ath delà, tanben i auec un espaci dedicat a Mistral ena clausura dera setmana, en tot visualizar-se ua pellicula dedicada ar autor occitan, dera Mòstra de Cinèma Occitan.

Segontes paraules de Jusèp Loís Sans, “er objectiu d’aguesta 12au Setmana Occitano Catalana ère hèr ua trobada entà debàter e hèr reflexions sus toti aqueri ahèrs restacadi damb era cultura occitano catalana, centrat sus tot en airau lingüistic”.

“Enguan auem hèt ua especiau mencion a un referent dera literatura occitana coma ei Frederic Mistral, pr’amor qu’en tot commemorar eth centenari dera sua mòrt, auem dat vida as sues òbres e a ua figura qu’encara aué dia ei plan importanta entar aranés, més tanben entath conjunt dera cultura occitana”, a higit Sans.