IMATGE: DEPARTAMENT DE CULTURA. GENERALITAT DE CATALUNYA.

• Damb aguesta aportacion economica eth govèrn d’Aran collabòre damb er Ajuntament de Les en sòn projècte de mantenement e melhora d’aguest conjunt istoric qu’ajudarà a méter en valor eth nòste auviatge culturau e dar a conéisher ua part dera nòsta istòria

Eth Conselh Generau d’Aran anonciec ager, pendent era visita ath terçon de Quate Lòcs amiada a tèrme ager pera sindica d’Aran, Maria Vergés, amassa damb es conselhèrs deth terçon, qu’aportarà 125.000 euròs ath projècte de mantenement e metuda en valor deth Castèth de Les impulsat per Ajuntament deth municipi.

“Aguest ei un projècte der Ajuntament de Les damb eth quau eth govèrn deth Conselh Generau d’Aran ei comprometut a collaborar pr’amor qu’aguest Castèth  represènte un element istoric fòrça relheuant qu’ei de besonh méter en valor e que pòt esdevier tanben un atractiu toristic de prumèr orde”, afirmaue era sindica d’Aran.

Enes pròplèu setmanes, eth Conselh Generau d’Aran e er Ajuntament de Les signaràn un convèni de collaboracion entà poder amiar a tèrme es trabalhs de besonh en aguest monument, catalolgat coma Ben Culturau d’Interès Nacionau (BCIN).