• Pendent era session plenària d’aué, eth govèrn deth Conselh Generau d’Aran a aprovat ua modificacion de credit qu’inclodís ua partida de 100.000 euròs que, coma forma de collaboracion damb er Ajuntament de Vielha e Mijaran, anaràn destinadi entath mantenement d’aguest equipament esportiu

Eth Plen deth Conselh Generau d’Aran en session extraordinària a aprovat aué, damb es vòts a favor d’UA e era abstencion de CA, era modificacion de credit deth pressupòst generau deth govèrn d’Aran entar an 2021. Aguesta modificacion inclodís ua partida de 100.000 euròs destinadi ath convèni de collaboracion damb er Ajuntament de Vielha e Mijaran entath manteniment deth Palai de Gèu.

“Aguest ei eth prumèr viatge qu’eth Conselh Generau d’Aran collabòre damb er Ajuntament de Vielha e Mijaran en manteniment d’aguest equipament e ac hèm pr’amor qu’èm convençudi dera importancia qu’a eth Palai de Gèu de Vielha entath conjunt dera poblacion dera Val d’Aran”, explicaue era sindica d’Aran, Maria Vergés, en tot híger que: “era nòsta poblacion a de besonh ua bona infraestructura esportiva mès èm conscients qu’eth consistòri a de besonh dera cooperacion e aportacion de d’autes entitats entà hèr front as problematiques qu’afècten ad aguesta infraestructura”.

Ath delà, aguesta darrèra modificacion de credit deth pressupòst deth Conselh Generau d’Aran incorpòre tanben ua partida de collaboracion damb era EMD d’Arròs e Vila entar emplec dera nau industriau qu’aucupe era brigada deth Conselh Generau e ua auta damb er Ajuntament de Naut Aran, damb era que se barre eth convèni entar apraiament deth campanar dera Glèisa de Salardú.