Eth Conselh Generau d’Aran e er Ajuntament de Vilamòs an signat un convèni de collaboracion en quau eth Govèrn aranés aportarà enquia un maximal de 6.000€ entara elaboracion d’un plan especiau que permete era installacion d’un camp de tir en sòn municipi.

Eth lòc prepausat ei ua anciana explotacion de lòsa que se tròbe en km. 4, a miei camin entre Pont d’Arròs e eth pòble de Vilamòs. Ei un espaci que facilite fòrça era installacion d’aguest equipament donques qu’era actuau esplanada producte dera explotacion de losèra permeterà bastir es installacions sense besonh de movements de materiau e per un aute costat se profitarà aguesta installacion entà revegetar er entorn e obtier un conjunt fòrça mès integrat.

Aguesta accion, que compde damb eth supòrt dera Societat de Caça e Pesca dera Val d’Aran, a de poder perméter a toti es practicants de tir ath plat poder realizar era sua aficion ara Val d’Aran sense auer de desplaçar-se, coma hèn ara, tà França.

En paraules deth conselhèr deth terçon de Lairissa, Frances Medan, “aguest equipament a d’èster un atractiu mès entath terçon de Lairissa e un incentiu entà qu’es practicants deth tir ath plat, dempús dera activitat, visiten es poblacions d’Arres e Vilamòs”. Eth baile de Vilamòs, Frances Castet, a ahijut qu’ “atau dinamizam es pòbles”.