• Eth govèrn deth Conselh Generau d’Aran a volut commemorar eth Dia Internacionau dera Hemna damb ua conferéncia online ena que cinc hemnes deth territòri compartiràn es sues experiéncies laboraus en entorns que tradicionaument an auut ua major proporcion d’òmes

Eth pròplèu deluns, 8 de març, se celèbre eth Dia Internacionau dera Hemna, e eth govèrn deth Conselh Generau d’Aran, en tot auer en compde era situacion sanitària actuau, a premanit un webinar sus hemnes araneses que trabalhen en entorns laboraus tradicionaument masculinizadi.

“Enguan era crisi provocada pera COVID-19 non mos permet realizar activitats presenciaus entà commemorar aguest dia, coma era tradicionau corsa dera hemna”, afirmaue era sindica d’Aran, Maria Vergés, en tot híger que:“damb aguest webinar volem dar a conéisher es viuences e opinions de diuèrses hemnes qu’an decidit desvolopar-se professionaument en encastres a on es òmes son majoria”.

En webinar “Hemnes en entorns laboraus masculinizadi”, qu’aurà lòc eth 8 de març entàs 19:00 ores, cinc hemnes deth territòri compartiràn es sues experiéncies laboraus en sectors coma eth còs de Pompièrs o des Agents de Miei Ambient, era ramaderia, es espòrts e era aviacion.

Totes es persones que i volguen participar, ac poiràn hèr a trauès d’aguest ligam: https://bit.ly/2PzxOHR