Vielha, 8 de març de 2017.- Aué dia 8 de març eth Conselh Generau d’Aran a commemorat eth Dia Internacionau dera Hemna, damb dus actes. En prumèr era conselhèra de Salut e Benéster, Anna Díaz, a liejut eth manifèst institucionau ena plaça deth Conselh Generau d’Aran.

Ara seguida, eth vicesindic d’Aran, Luís Carlos Medina  era madeisha conselhèra Anna Díaz e era tecnica deth SIAH (Servici d’Informacion e Atencion ara Hemna) Montse de Burgos, an presentat eth Plan d’Igualtat deth Conselh Generau, restacat ath desvolopament dera Lei 17/2015 d’igualtat efectiua d’hemnes e òmes, enes administracions, organismes publics e entitats privades.

Pendent era presentacion eth vicesindic d’Aran, Luís Carlos Medina, a destacat es particularitats e eth desvolopament deth Plan d’Igualtat, enes vessants dera administracion, des enterpreses e de particulars, en tot hèr mencion ara importància dera preséncia des hemnes enes encastres e lòcs de responsabilitat deth madeish Conselh Generau d’Aran, coma dera societat aranesa en generau. Medina a arrebrembat qu’eth Conselh Generau d’Aran, dempús dera sua restitucion en an 1990, dues hemnes, Pilar Busquets e Amparo Serrano an ostentat eth cargue de sindica dera maxima institucion aranesa.

En sòn torn, era directora deth SIAH, Montse de Burgos, a explicat a grani trèti es caracteristiques fonamentaus deth Plan d’Igualtat deth Conselh Generau d’Aran, en tot destacar-ne eth marc normatiu, es diferenti encastres d’accion, e era obligacion dera institucion d’aufrir es estruments entà er accès ara aucupacion, era formacion e era promocion enes lòcs e es condicions de trabalh; atau coma promòir era conciliacion personau, laborau e familhau.

De Burgos, a soslinhat qu’en cas deth Conselh Generau d’Aran, se complís era paritat, donques era plantilha l’intègren un 51% d’hemnes e un 49% d’òmes.

Fin finau, era conselhèra Anna Díaz a volut soslinhar eth papèr fonamentau dera familha en assolidatge d’ua igualtat reau entre òmes e hemnes ena societat, coma tanben eth papèr dera escòla, per çò qu’ei era coeducacion des mès petiti.

Es actes commemoratius deth Dia Internacionau dera Hemna barraràn eth pròplèu dimenge 12 de març tas 11 ores, , damb era celebracion dera “4au edicion dera Còrsa dera Hemna Val d’Aran”. Era corsa ei daurida a toti e a totes es edats e se pòt hèr corrent o en tot caminar, en un circuit urban de 5km pes carrèrs de Vielha. S’i voletz participar encara vos participar encara vos podetz inscríuer a: https://www.inscripcions.cat/corsaderahemna2017/