Vielha, 15 de junh de 2017.- Eth departament d’Agricultura, Ramaderia e Miei ambient deth Conselh Generau d’Aran, confirmèc aué qu’er os Goiat tornèc a atacar a ua cavala era net deth 10 ath 11 de junh ena zòna de Salient.
En aguesta ocasion er atac siguec a ua cavala adulta que la perseguic pes pastures enquia qu’artenhec dar-li mòrt, segontes an pogut constatar es agents de Miei ambient deth Conselh Generau d’Aran segontes es indicis trobadi.
Es agents an confirmat que pendent tres nets er os s’a alimentat dera madeisha cavala segontes era informacion obtenguda mejançant es localizacions GPS qu’arreceben entath seguiment d’aguest exemplar. Autes tralhes recentes deth seguiment indiquen que Goiat poderie anar acompanhat d’ua femelha.
Eth seguiment per GPS a detectat ar os Goiat es darrèri tres dies enes zònes de Varradós, Salient (a on se produsic er atac), Bagergue e Montgarri. Goiat, siguec liberat en Palhars hè un an en marc deth programa Piroslife.
