• Aguesti espacis, plaçadi en HUB d’innovacion rurau HèPic e en CEI de Casau, acuelheràn a persones emprenedores, petites empreses, startups o professionaus independents entà qu’agen un lòc fisic a on trabalhar, compartir idèes e coneishements, e ei previst que se meten en foncionament enes pròplèus setmanes

Eth Plen deth Conselh Generau d’Aran a aprovat aué, ena sua session extraordinària, eth reglament des espacis coworking en Hub de innovacion rurau HèPic e en CEI de Casau.

Es espacis de coworking son oficines compartides enes quaus persones emprenedores, petites empreses, startups o professionaus independents se dan cita entà trabalhar en un madeish espaci, a on pòden crear un hilat de contactes e compartir idèes e coneishements.

“Era apòsta deth Conselh Generau d’Aran pera creacion, implantacion e expansion de projèctes innovadors e sostenibles damb impacte positiu ena Val d’Aran ei clara, e era creacion d’espacis de coworking en nòste territòri va ena linha d’aguesta apòsta pera innovacion e era retencion deth talent joen” afirmaue era sindica d’Aran, Maria Vergés, en tot híger que: “volem aufrir as joeni emprenedors e emprenedores totes es facilitats ena nòsta man entà que poguen arténher es sòns objectius e dotar-les d’espaci e facilitats a trauès deth nòste Hub d’innovacion”.

Dempús dera aprovacion d’aguest reglament per part deth Plen, era metuda en foncionament d’aguesti espacis ei inminenta e se demore poder-les daurir ath public enes pròplèus setmanes.

En aguest Plen s’a aprovat tanben ua modificacion de credit qu’a de perméter amiar a tèrme quauques licitacions qu’an quedat desèrtes o an auut cèrta complexitat pes dificultats que se viu en aguesti moments pera inflacion.

Eth Plen deth Conselh Generau d’Aran a aprovat tanben, per unanimitat, era declaracion der an 2022 coma An Sandaran entà commemorar eth 80 aniversari dera mòrt d’aguest insigne aranés. Se realizaràn un seguit d’actes coma era presentacion deth libre sus era vida e òbra de Sandaran, era realizacion d’un video commemoratiu e d’autes activitats que s’anaràn anonciant ath long der an.

Ath delà, eth Conselh Generau d’Aran a recuperat dejà es Plens ena sedença institucionau dera maxima institucion aranesa, era Casa deth Senhor d’Arròs, dempús de dus ans d’auer-les de celebrar ena sedença administrativa pr’amor dera situacion sanitària.