• Damb aguest nau esturment, que forme part deth Plan de Comunicacion Institucionau qu’era maxima institucion aranesa premanís, se pretén difóner tota aquera informacion que pogue èster d’interés ciutadan e qu’age a veir damb es diferents airaus que gestione eth Conselh Generau

Eth Conselh Generau d’Aran daurís un nau canau de comunicacion ciutadana qu’a nomentat: “Comunicacion CiutAran”, entà fomentar e enfortir es ligams entre era institucion e era ciutadania, en tot difóner diuèrsa informacion d’interés.

Er objectiu d’aguest nau canau ei dar a conéisher ath conjunt dera ciutadania aranesa ahèrs relacionadi damb airaus coma sanitat, gestion de residus, igualtat de genre o foment dera lengua, entre d’auti.

Aguesta naua via de comunicacion cercarà informar des accions que realize eth Conselh e, se prevé tanben qu’enes pròplèu mesi se pogue lançar ua auta iniciativa entà qu’era ciutadania hèsque a arribar ara maxima institucion aranesa es sues prepauses e reclamacions entà bastir un hilat institucionau dubèrt, fòrt e transparent en Aran.

“Damb aguesta prumèra accion pretenem daurir era institucion entà, per un costat, establir un canau de comunicacion directe damb era ciutadania aranesa e, per aute, entà dar a conéisher eth trabalh qu’amie a terme eth Conselh Generau, atau coma tanben méter en valor era nòsta institucion” manifèste era vicesíndica prumèra, Maria Vergés.