Eth Plen deth Conselh Generau d’Aran, en session extraordinària celebrada aué diuendres, 14 d’agost, a aprovat era creacion dera Comission d’Ahèrs Institucionaus, un organ damb facultats d’estudi, consulta e assisténcia des organs de decision deth Conselh Generau d’Aran, unica e exclusivament entà assessorar ath Govèrn sus era politica generau dera Institucion, especiaument en çò que tanh ath desvolopament dera naua Lei 1/2015, de 5 de hereuèr, deth regim especiau d’Aran.

Aguesta Comission estarà integrada per membres de toti es grops politics que formen part dera corporacion, proporcionauments ara sua representativitat en Conselh, e en paraules deth sindic d’Aran, Carlos Barrera, “a d’èster un òrgan de trebalh e debat des ahès que tanhen ath País”.

Per un aute biais, eth Plen deth Conselh Generau a ratificat, per unanimitat de toti es grops politics, eth Convèni de Collaboracion entre era Fundacion Endesa e eth Conselh Generau entà minimizar es efèctes des inundacions de junh de 2013, er objècte deth quau ei establir eth finançament entara execucion deth Projècte de reparacion dera quèrra der arriu Garona e reposicion deth Camin Reiau enes TTMM de Vilamòs e Es Bòrdes per un impòrt de 400.000 €.

En paraules deth vicesindic d’Aran, Luis Carlos Medina, “damb aguest convèni, eth Conselh Generau seguís ena linha de cercar era collaboracion publico/privada entà desvolopar projèctes d’interés entà Aran, qu’està aportant boni resultats aguesti darrèri ans entàs vesins e vesies dera Val d’Aran”.

En aguesta session tanben s’an prenut d’auti acòrds referenti ara reestructuracion e organizacion deth nau Conselh Generau d’Aran, era aprobacion deth Compde Generau deth Conselh der exercici 2014 atau coma era aprobacion dera modificacion des Estatuts deth Consòrci Leader Pirineu Occidental amassa damb era ratificacion des membres deth Conselh Generau d’Aran en aguest consòrci.

Era conselhèra de Torisme e Desvolopament Economic d’Aran, Anna Díaz.

“Eth Departament d’Agricultura, Ramaderia, Pesca e Alimentacion dera Generalitat de Catlonha aprovèc eth passat 22 de junhsèga era seleccion des 11 Grops d’Accion Locau de Catalonha e es estratégies de desvolopament locau que presentèren cada Grop” a informat era conselhèra de Torisme e Desvolopament Economic d’Aran, Anna Díaz, e a soslinhat que “per prumèr còp, era Val d’Aran ei presenta en un Grop d’Accion Locau e aquerò mos permeterà accedir as ajuts LEADER”.

Eth Conselh Generau d’Aran tanben a aprovat per unanimitat de toti es grops deth Plen eth Convèni de collaboracion entre eth Departament d’Agricultura, Ramaderia, Pesca, Alimentació i Medi Natural, organisme pagador des hons FEAGA e FEADER, e eth Conselh Generau d’Aran referent ar exercici des foncions der organisme pagador, atau coma era cession gratuïta definitiva deth 50% en proindivís ar Ajuntament de Naut Aran der immòble plaçat ara nautada deth pk. 30,500 dera carretèra C-28, deth tèrme municipau de Naut Aran, afectat ath servici d’usatge public de parcatge de veïculs.

Atau madeish, eth Plen deth Conselh Generau a estat informat qu’en data 17 de junhsèga se notifiquèc ath Conselh Generau d’Aran era resolucion deth conseller de Territòri e Sostenibilitat dera Generalitat de Catalonha de modificacion deth redactat der article 112 coma conseqüéncia dera estimacion parciau deth requeriment interpausat peth Conselh Generau d’Aran, que segontes paraules deth sindic d’Aran, Carlos Barrera “recuelh era màger part des demanes realizades peth Conselh Generau en requeriment aprovat peth Plen del Conselh damb data 24 de març e formalizat damb data 30 de març”.

Damb aguesta darrèra resolucion referenta ara modificacion deth Plan Director Urbanistic dera Val d’Aran, “s’a artenhut ua major clarificacion sus er usatge e possibilitat de reabilitacion e manteniment des bòrdes e cabanes dera Val d’Aran, e ua clara definicion der usatge ludic/familiar d’aguestes construccions” a explicat eth sindic d’Aran, Carlos Barrera.

Atau madeish “aguesta resolucion tanben daurís era redaccion deth Plan Especiau Urbanistic en àmbit dera Garona qu’a de definir es usatges permetudi atau coma era possible legalizacion des activitats economiques preexistents”, a hijut Barrera.

Finauments, eth Plen deth Conselh a aprovat, tanben per unanimitat de toti es grops, era cession der usatge deth locau proprietat dera Cambra Oficial de Comerç i Indústria de Lleida designada damb era letra L-4 ena planta baisha der Edifici Val d’Aran en Vielha, a as associacions professionaus e empresariaus d’Aran.