• Aguestes subvencions formen part dera concession d’ajuts a explotacions ramaderes plaçades en zònes de montanha damb dificultats especiaus der an 2019

Per prumèr viatge es ramadèrs aranesi compdaràn damb ua ajuda entà compensar-les es pèrtes generades peth bestiar despareishut pr’amor d’incleméncies meteorologiques o er atac de grani carnivors coma er os.

Eth Departament de Territòri, Paisatge e Gestion ambientau deth Conselh Generau d’Aran a dubèrt dejà era convocatòria destinada a ramadèrs damb explotacions plaçades en zònes de montanha damb dificultats especiaus, que cerque compensar era gessuda prematura des peisheus de bestiar gròs o eth bestiar desapareishut pendent er an 2019.

Eth conselhèr de Territòri, Paisatge e Gestion ambientau, Francés Bruna, afirme qu’aguest “ei eth prumèr còp qu’eth Conselh Generau d’Aran contemple, ara ora de proporcionar ajudes as ramadèrs, eth bestiar desapareishut, que jamès abantes s’auie auut en compde” e hig que “eth supòrt ara ramaderia aranesa ei un des nòsti principaus objectius”.

En concrèt, er impòrt dera subvencion pera gessuda prematura des peishèus deth bestiar gròs serà eth còst miei deth mantenement deth bestiar, mentre qu’er impòrt der ajut per bestiar desapareishut serà deth 50% deth valor deth bestiar desapareishut pendent era estada ena montanha.

Eth tèrme de presentacion de sollicituds ei enes 20 dies obrants ath 21 de gèr de 2020 e es bases d’aguesta convocatòria se pòden consultar en BOP de Lleida.