• Era Lei sus es bonificacions des energies renovables aprovada per Executiu deth govern central, tanben afècte grèument ara Val d’Aran

Era reduccion d’un 40% que se preten aplicar ad aguest sector hè inviable era contunhetat dera activitat economica dera empresa Neolectra ubicada en pòble de Les.

Aguesta empresa optimize era produccion electrica damb eth cahuament dera aigua entara piscifactoria d’esturions e er aprofitament de CO2 utilizat entàs begudes carboniques.

Per tant eth sòn barrament a grèus afectacions tath nòste País, era pèrta de lòcs de trabalh estables ena Val d’Aran a ues conseqüéncies fòrça mès grèus qu’en d’auti lòcs a on existissen majors oportunitats laboraus.

Tanben se pòt pèrder un referent coma ei era produccion de caviar, consolidada ath laguens deth mercat coma un producte de maxima qualitat, que met de valor era qualitat des aigües deth Garona e deth medi ambient d’Aran.

Des deth Conselh Generau d’Aran auem hèt es gestions de besonh ath dauant dera conselhèria d’Empresa e Aucupacion dera Generalitat de Catalunya entà que hèsque totes es accions ath dauant deth Govèrn Centrau entà que reconsidère era Lei sus es bonificacions des energies renovables en estat Espanhòu.

Eth pròplèu dia 14 d’abriu, eth conseller d’Empresa e Aucupacion dera Generalitat de Catalunya, Felip Puig, s’amassarà damb eth Director dera empresa Neolectra. En aguesta amassada tanben ei prevista era preséncia deth sindic d’Aran, Carlos Barrera, qu’a manifestat “èm conscients qu’aguest barrament ei conseqüéncia d’ua decision deth Govèrn Centrau e dificilment se pòden prevéir solucions concrètes entà cada cas, mès tenguent en compde era oposicion det tot eth sector ad aguesta Lei, dilhèu òc que i poderie auer ua reconsideracion des plantejaments ena quantia dera reduccion dera prima qu’harie possible era viabilitat economica de Neolectra, en tot garantir atau es lòcs de trabalh.”