• En tot dar responsa as demanes des vesins e vesies d’Arties, eth Conselh Generau d’Aran a decidit conjuntament damb er Ajuntament de Naut Aran e era EMD d’Arties e Garòs extrèir es contenedors der interior deth pòble e crear ua naua ièrla de contenedors ena entrada ara poblacion peth carrèr Mòla

Eth conselhèr de Territòri, Paisatge e Gestion ambientau, Oriol Sala, e eth conselhèr d’Economia, Torisme e Promocion economica, Josep Canut, s’an amassat aguest maitin damb er alcalde de Naut Aran, César Ruiz-Canela, e era presidenta dera EMD d’Arties e Garòs, Lina Fanlo, e es servicis tecnics de gestion de residus deth Conselh Generau d’Aran, entà determinar un nau plaçament des contenedors qu’actuaument se trapen en interior deth pòble d’Arties, en tot dar responsa a ua demana presentada pes vesins e vesies dera poblacion entà extrèir es contenedors soterradi dera zòna urbana.

“Era passada tardor dejà mos amassèrem damb es alcaldes e alcaldesses entà determinar de quina forma podíem melhorar eth servici de remassada de lordères en cada pòble”, a rebrembat eth conselhèr Sala, en tot especificar que: “en cas d’Arties prepausèrem eth replaçament de bères ièrles de dificil accès, especiaument en epòca d’iuèrn, qu’aué auem consensuat que siguen retirades dera zòna urbana”.

S’a decidit extrèir es contenedors actuaument plaçadi en interior deth pòble e crear ua macroièrla en un solar pròp dera entrada a Arties peth carrèr Mòla, que s’adequarà damb era collaboracion deth consistòri municipau.

“Des deth govèrn deth Conselh Generau d’Aran pensam qu’aguest reajust serà plan positiu entà melhorar eth servici de remassada e evitar es acumulacions e d’autes problematiques que compòrten, especiaument, es contenedors soterradi qu’ara madeish se placen en plena zòna urbana deth pòble d’Arties”, afirme eth conselhèr Canut.