• Eth periodista e conselhèr d’Aquitània peth Partit Occitan, David Grosclaude, comencèc era setmana passada ua grèva de gana en defensa dera lengua occitana.

• Grosclaude denoncie qu’er estat francés non active era Oficina Publica dera Lengua Occitana

David Grosclaude, en sòn 6au dia de grèva de gana. (A.TORRENT) 

David Grosclaude, conselhèr regionau d’Aquitània ei en grèva de gana des deth passat dia 27 de mai peth mensprètz qu’arrecep era lengua occitana per part deth Govèrn francés, en non voler dar continuïtat ara creacion dera Oficina Publica dera Lengua Occitana (OPLO), qu’a estat demanada pes Govèrns Regionaus d’Aquitània e de Meddia Pirenèus.

Era lengua occitana, nomentada aranés en Aran, ei oficiau en Catalonha e a d’èster objècte de proteccion en toti es encastres e sectors, cossent damb era normativa aplicabla. Ei era prumèra lengua dera administracion aranesa, ei era lengua veïculara dera escòla aranesa, a ua preséncia importanta enes mies de comunicacion, ei protegida pes institucions e pes leis e normatives catalanes e araneses.

Euròpa a ua riquesa lingüistica que cau protegir e era lengua occitana ei un des sòns referents.

Eth Conselh Generau d’Aran se some e da supòrt ara peticion valenta de David Grosclaude en defensa dera lengua occitana e lamente que calgue arribar ad aguestes accions entà èster escotats ena defensa dera pròpria identitat.