Eth passat dia 5 de mai tornèc ara Val d’Aran era imatge gotica de Sant Joan Baptista (s. XIV), titular deth santuari de Sant Joan d’Arròs e Vila qu’eth Conselh Generau d’Aran, amassa tamb d’autes sies imatges gotiques araneses -era Mair de Diu d’Arròs, eth Sant Jaime e eth Sant Estèue d’Arties, eth Sant Pèir d’Escunhau e era Mair de Diu e eth Sant Estèue de Tredòs- portèc a restaurar en 2016 en Centre de Restauració de Béns Mobles de Catalunya, en Valldoreix (Barcelona), en tot acuélher-se a ua subvencion dera Generalitat de Catalonha.

Es trabalhs de restauracion an consistit ena desinfeccion preventiua dera òbra e, confirmada per ues cates era existéncia de policromia mès antica dejós deth repint modèrn, s’a procedit ara eliminacion d’aguest.

S’a podut comprovar qu’aguesta policromia subjacent ara descobèrta, ei de fòrça major qualitat e qu’en part, possiblament se tracte dera originària.

Consistís en ua tunica daurada, en pèu brun de barba e deth cap e en rèstes dera carnacion. En cas dera cara, a on es rèstes de policromia èren fòrça escassi, s’a optat per ua reintegracion des lacunes a fin qu’aguestes non distorsionen era visualizacion dera imatge.

Eth dimenge dia 7 de mai, era imatge restaurada deth Sant Joan Baptista poguec presidir era romeria que d’abitud se celebre en sòn aunor. Es autes imatges ei previst que retornen ara Val d’Aran en mes de junh.

Vielha, 12 de mai de 2017

Conselh Generau d’Aran: Núria Sanjuan