Vielha, 5 d’agost de 2016.- Eth Conselh Generau d’Aran a daurit aguesta setmana eth periòde entà sollicitar es ajudes e subvencions economiques entara sason 2016/2017 as joeni esportistes aranesi. Er objectiu d’aguestes ajudes ei motivar era continuïtat dera sua carrèra esportiva  mentre estudien, damb era finalitat que poguen acabar convertint-se en esportistes de naut rendiment.

Es requisits indispensables entà èster beneficiari d’aguestes ajudes son:  corsar ensenhaments obligatòris (ESO) o post obligatòris (Cicles Formatius o Estudis Universitaris), entre es 14 e es 22 ans, èster esportistes en actiu e auer aprovat totes es assignatures deth darrèr cors academic.

Entà concedir es subvencions eth Conselh Generau d’Aran crearà ua Comission Tecnica d’Avaloracion integrada, entre d’auti,  peth conselhèr d’Espòrts e Joenessa deth Govèrn d’Aran Luís Carlos Medina e peth responsable tecnic deth Conselh Esportiu dera Val d’Aran.

Se concediràn dus tipe de subvencions:

-Beca A per un impòrt de 1.500 €

-Beca B per un impòrt de 750 €

Entà concedir aguestes ajudes se considerarà era edat des esportistes, atau coma es resultats esportius obtenguts, e es diferents nivèls de competicion en qué participen (grop de competicion internacionau, estatau o autonomica).

Eth tèrme de presentacion de sollicituds  ei enquiath 30 de seteme de 2016.

Trobaratz  tota era informacion en enlaç següent:

https://tauler.seu.cat/pagDetall.do?idEdicte=78392&idens=8103980001