Vielha, 1 de seteme de 2017.- Eth Conselh Generau d’Aran a daurit eth periòde entà sollicitar es ajudes e subvencions economiques entara sason 2017/2018 entàs joeni esportistes aranesi. Er objectiu d’aguestes ajudes, ei motivar era contunhitat dera sua carrèra esportiua mentre estúdien, damb era fin que poguen convertir-se en esportistes de naut rendiment. Eth termini de presentacion de sollicituds ei dubèrt enquiath 30 de seteme de 2017.

Es requisits indispensables entà èster beneficiari d’aguestes ajudes son, corsar ensenhaments obligatòris (ESO) o post obligatòris (Cicles Formatius, Bachillerat o Estudis Universitaris), entre es 12 e es 22 ans, èster esportistes en actiu e corsar actuauments quinsevolhe des estudis establidi en article 3 des bases.

Auer aprovat eth percentatge de matèries que s’indiquen a continuacion:

En cas de corsar estudis d’ESO o Bachillerat, auer aprovat 100% des matèries matriculades en cors anterior ar actuau.

En cas de corsar estudis universitaris:

Carrères tecniques: Èster matriculadi en un minim de 50% de matèries e auer aprovat 70% des crèdits matriculadi en cors anterior ar actuau.

Carrères umanistiques, sociaus, letres: Èster matriculadi en un minim de 50% de matèries e auer aprovat 80% es crèdits matriculadi en cors anterior ar actuau.

Ath delà ei de besonh qu’es beneficiaris siguen residents en Aran, damb un empadronament en quinsevolh des municipis aranesi pendent un minim de dus ans immediataments anteriors ad aguesta convocatòria.

Entà concedir es subvencions deth Conselh Generau d’Aran, crearà ua Comission Tecnica d’Avaloracion, integrada entre uns auti peth conselhèr d’Espòrts e Joenessa deth Govèrn d’Aran Luís Carlos Medina e peth responsable tecnic deth Conselh Esportiu dera Val d’Aran.

Se concediràn dus tipes de subvencions:

• Bèca A per un impòrt de 1.500 €.

• Bèca B per un impòrt de 750 €.

Entà concedir aguestes ajudes, se considerarà era edat des esportistes, atau coma es resultats esportius obtengudi e es diuèrsi nivèus de competicion en que participen (grop de competicion internacionau, estatau o autonomic).

Eth termini de presentacion de sollicituds ei enquiath 30 de seteme de 2017.