• Damb aguesta declaracion coma BCIL, eth govèrn d’Aran dòte ad aguest monument d’ua proteccion especiau pr’amor deth sòn valor istoric e patrimoniau

Eth Plen deth Conselh Generau d’Aran a aprovat iniciaument aguest maitin, pendent era celebracion dera sua session ordinària, era declaracion e catalogacion dera Glèisa de Sant Joan d’Arties coma Ben Culturau d’Interès Locau, en tot dotar-la atau d’ua proteccion especiau pr’amor deth sòn valor istoric e patrimoniau.

“Deth govèrn d’Aran ençà èm conscients èm conscients deth valor istoric, patrimoniau, culturau e identitari qu’an es monuments e conjunts istorics deth nòste territòri, e ei era nòsta volontat balhar-les era maxima proteccion entà evitar que se maumeten damb eth temps”, explicaue era sindica d’Aran, Maria Vergés, en tot híger que: “damb era catalogacion coma BCIL dera glèisa de Sant Joan, artenhem era obligacion per part des administracions de invertir recorsi entara sua preservacion, en tot garantir atau eth suenh ath nòste auviatge e era nòsta cultura, que son un des grans tresaurs dera Val d’Aran”

Pendent eth Plen celebrat aguest mamitin ena Casa deth Senhor d’Arròs, s’a procedit tanben ara aprobacion iniciau deth Reglament d’Aunors e Distincions deth Conselh Generau d’Aran, dempús qu’en an 1993 s’aprovèsse un reglament regulador d’aguest tipe de guerdons que, finauments, non arribèc a èster aprovat de forma definitiva.

En aguest sens, era sindica d’Aran afirmaue que: “eth reconeishement public e solemne des accions e trajectòries meritòries des persones, des comportaments o actuacions mès directaments restacadi as principis, valors e etica qu’an de regir tota societat democratica, igualitària e desvolopada, ei un déuer entà quinsevolh administracion publica” e higie que: “eth Conselh Generau d’Aran, a trauès d’aguest reglament, assomís coma pròpri aguest déuer damb eth convenciment qu’eth sòn compliment beneficie, non sonque as persones e institucions guerdonades, se non tanben, e principauments, ara pròpria societat aranesa en quin nòm s’aunore as madeishes, pr’amor qu’eth reconeishement solemne des merits adquiridi a trauès dera amiada a tèrme d’actes en favor dera Val d’Aran e era sua gent, refòrce era identitat aranesa ath temps que la convertís en integradora e en element de coesion sociau”.

Vielha, 19 de mai de 2022