• Damb aguesta declaracion coma BCIL, eth govèrn d’Aran dòte ad aguesti monuments d’ua proteccion especiau pr’amor deth sòn valor istoric e patrimoniau
Eth Plen deth Conselh Generau d’Aran aprovèc definitivament eth passat diuendres, pendent era celebracion dera sua session ordinària, era declaracion e catalogacion dera Glèisa de Sant Joan d’Arties coma Ben Culturau d’Interès Locau (BCIL), en tot dotar-la atau d’ua proteccion especiau pr’amor deth sòn valor istoric e patrimoniau. E, se procedic tanben ara aprobacion iniciau dera declaracion e catalogacion de Joanchiquet de Vilamòs coma BCIL.
“Deth govèrn d’Aran ençà èm conscients deth valor istoric, patrimoniau, culturau e identitari qu’an es monuments e conjunts istorics deth nòste territòri, e ei era nòsta volontat balhar-les era maxima proteccion entà evitar que se maumeten damb eth temps”, explicaue era sindica d’Aran, Maria Vergés, en tot híger que: “damb era catalogacion dejà definitiua dera glèisa de Sant Joan, e tanben era aprobacion iniciau de Joanchiquet de Vilamòs coma BCIL artenhem era obligacion per part des administracions de invertir recorsi entara sua preservacion, en tot garantir atau eth suenh ath nòste auviatge e era nòsta cultura, que son un des grans tresaurs dera Val d’Aran.”
Cau rebrembar qu’eth Conselh Generau d’Aran auec de declarar en mes de gèr era caducitat des expedients d’incoacion de Bens Culturaus d’Interès Nacionau (BCIN) de 8 glèises araneses, 39 conjunts istorics des cascs urbans dera Val d’Aran e 3 monuments istorico-artistics deth nòste terriòri dempús qu’er Ajuntament de Naut Aran, en deseme de 2020, denoncièsse er expedient administratiu de declaracion coma BCIN d’aguesti monuments.
Era declaracion coma BCIN d’aguesti 50 elements patrimoniaus en an 1976 non s’arribèc a completar, totun aguesti monuments e conjunts istorics demorauen protegidi e podien acuelher-se a subvencions e ajudes entara sua preservacion.
En aguest sens, Vergés declaraue que: “deth govèrn d’Aran ençà trabalham de hè fòrça mesi entà restablir era proteccion a toti aguesti elements patrimoniaus e cercam solucions entà dotar-les dera proteccion qu’eth noste auviatge merite a trauès des diuèrses figures urbanistiques actuaus e de d’autes que s’an de crear e enes que ja trabalham”.
Vielha, 21 de seteme de 2022