• Eth Plen dera maxima institucion aranesa a aprovat per unanimitat aguest maitin era declaracion e catalogacion des glèises Sant Andrèu de Salardú, Santa Eulària d’Unha e era Capèla de Sant Blas de Les coma Bens Culturaus d’Interès Locau (BCIL), en tot dotar atau aguesti monuments d’ua proteccion especiau pr’amor deth sòn valor istoric e patrimoniau

Eth Conselh Generau d’Aran a celebrat aguest maitin eth sòn Plen en session ordinària, a on s’a aprovat per unanimitat era declaracion e catalogacion coma Bens Culturaus d’Interès Locau  des glèises Sant Andrèu de Salardú, Santa Eulària d’Unha e era Capèla de Sant Blas de Les.

“Deth govèrn d’Aran ençà èm comprometudi damb era proteccion e promocion deth nòste patrimòni e ei era nòsta volontat evitar que se maumete damb eth temps, conscients deth valor culturau e identitari qu’an es nòsti monuments e conjunts istorics” afirmaue era sindica d’Aran, Maria Vergés, en tot híger que: “damb era declaracion coma BCIL des glèises de Salardú e Unha e era Capèla de Les, artenhem qu’es administracions agen era obligacion d’invertir recorsi entara sua preservacion, en tot garantir atau eth suenh ath nòste auviatge e era nòsta cultura, que son un des grans tresaurs dera Val d’Aran”.

En gèr de 2022, eth Conselh Generau d’Aran auec de declarar era caducitat des expedients d’incoacion de Bens Culturaus d’Interès Nacionau (BCIN) de 8 glèises araneses, 39 conjunts istorics des cascs urbans dera Val d’Aran e 3 monuments istorico-artistics deth nòste terriòri dempús qu’er Ajuntament de Naut Aran, en deseme de 2020, denoncièsse er expedient administratiu de declaracion coma BCIN d’aguesti monuments. Era declaracion coma BCIN d’aguesti 50 elements patrimoniaus en an 1976 non s’arribèc a completar, totun, aguesti monuments e conjunts istorics demorauen protegidi e podien acuelher-se a subvencions e ajudes entara sua preservacion.

“Dempús dera denóncia der Ajuntament de Naut Aran, que deishec destropegidi aguesti conjunts patrimoniaus e istorics, deth Conselh Generau d’Aran estant encetèrem ua linha de trabalh entà restablir era proteccion a toti aguesti elements patrimoniaus, en tot cercar solucions entà dotar-les dera proteccion qu’eth noste auviatge merite a trauès des diuèrses figures urbanistiques”.