• A despièch qu’eth govèrn catalan a anonciat qu’es sòns pressupòsti elevaràn era despena en un 17%, non contemplen inversions en Aran

• Era sindica d’Aran, Maria Vergés, a hèt arribar ua carta ath president dera Generalitat ena qué li exprèsse mauestar deth Conselh Generau per aguesta situacion, que se some ath grèuge istoric que patís eth nòste territòri e qu’a supausat, entre 2010 e 2022, un deficit ena inversion dera Generalitat deth -84%

• Vergés a reclamat tanben resòler eth conflicte sus eth pagament ath Conselh Generau d’Aran des 570.000€ corresponents ara aportacion addicionau de 2021, signada en acòrd de finançament de 2019, e destinada a compensar ara Val d’Aran peth desvolopament de politiques pròpries que sigueren retalhades, que n’aguesti moments non a estat aportada e que dificulte eth barrament deth pressupòst deth Conselh Generau d’Aran tath pròplèu an

Era sindica d’Aran, Maria Vergés, a dirigit ua missiva ath president dera Generalitat de Catalunya, Pere Aragonès, en tot expressar eth mauestar deth govèrn deth Conselh Generau d’Aran deuant dera manca d’inversion en Aran prevista enes pressupòsti dera Generalitat entà 2022.

“Es passades setmanes se publiquèc eth projècte de pressupòsti dera Generalitat de Catalunya entà 2022 que, segontes era informacion publicada peth pròpri govèrn, eleve era despena enquia un valor rècord de 38.139 milions d’euròs, 5.618 milions mès qu’er an anterior, çò que supause un increment deth 17,3%, ath delà d’augmentar era inversion en sector public ath doble dera pressupostada en 2020 e incorporar 2.142 milions d’euròs der hons Next Generation”, explicaue era sindica d’Aran, en tot híger que “a despièch d’açò, aguesta melhora des compdes dera Generalitat non a comportat, nauament, un aument ena inversion en Aran, hènt que, atau e coma ven succedint enes darrèri ans, eth nòste territòri non recebe cap inversion important qu’ajude a melhorar era vida dera gent que viu e trabalhe ena Val d’Aran e sigue, de luenh, eth territòri pirenenc damb un deficit d’inversion mès naut, concretament d’un -84% entre 2010 e 2022”.

En aguest sens, era sindica d’Aran manifestaue ath president Aragonès que “aguesta ei ua qüestion que mos provòque un prigond mauestar, especiaument auent en compde es compromisi aqueridi peth govèrn catalan entà, entre d’auti ahèrs, melhorar era carretèra C-28 a trauès deth finançament europèu o dotar Aran d’un centre culturau, coma a era rèsta deth Pirenèu, quauquarren que, malerosament, incidís en grèuge istoric qu’Aran patís de fòrça decades ençà”.

Ad aguesta manca d’inversion se hig tanben er hèt qu’a dia d’aué non s’a resolvut encara eth conflicte entà qu’eth Conselh Generau d’Aran recebe era dotacion addicionau corresponent a 2021 der Hons de Finançament Incondicionat, frut der acòrd de finançament entre andús govèrns signat en març de 2019 e que, atau e coma era Generalitat comuniquèc pendent era darrèra Comission Bilaterau, eth Conselh non a receberà enguan per manca de hons.

Per aguesti motius, era sindica d’Aran demanaue ath president “qu’amie a tèrme es gestions pertinentes entà resòlver aguesta situacion e poder mantier atau era relacion bilaterau de respècte e leiautat institucionau ena que mos auem emplaçat a trabalhar”.