Vielha, 7 de deseme de 2018.- Eth Conselh Generau d’Aran a trauès dera enterpresa Servicis Ambientaus dera Val d’Aran (SAVA S.L.) e damb eth supòrt dera Deputacion de Lhèida, a executat desparières accions de reabilitacion ena glèisa de Sant Tomás de Casarilh.

Es accions an consistit en apariament deth paviment dera glèisa e dera sacristia, ath delà de rehèr eth tet d’ua des naus lateraus dera glèisa. Eth Govèrn de Aran a destinat 26.600 € ad aguestes reformes dera glèisa.

Tanben s’a realizat ua restauracion d’urgéncia dera imatge dera Vèrge de Casarilh, damb un pressupòst de 1.538 €.

Era glèisa de Sant Tomás o San Martin de Casarilh, d’origina romanica, probablaments deth sègle XII, a estat fòrça remodelada ath long des ans. Dera sua epòca reneishentista destaque era pila baptismal sostenguda per un pedestau romanic e un notable Crist romanic des sègles XII-XVII.