- Eth departament de Territòri, Paisatge e Gestion Ambientau deth Conselh Generau d’Aran despartís aguestes setmanes naui colièrs GPS as ramadèrs d’Aran entath contròl e supòrt deth bestiar
- Abans dera primauera se repartiran, entre es ramadèrs deth país, lèu 400 colièrs GPS que, gràcies ath plaçament de 11 antenes de cobertura LORA en tota era Val d’Aran, facilitaran eth sòn prètzhèt a trauès dera monitorizacion deth bestiar qu’ajude ena prevencion d’atacs d’os.
Eth Conselh Generau d’Aran auance damb era implementacion deth sòn projècte de cobertura LORA entà facilitar ath sector ramadèr era gestion des sòns ramats ena montanha, un projècte que, ath delà, ajude a hèr eth nòste territòri mès competitiu digitauments, en tot generar un nau marc d’oportunitats a nivèu tecnologic.
Eth departament de Territòri, Paisatge e Gestion Ambientau repartís entre es ramadèrs aranesi lèu 400 colièrs GPS qu’an de servir “entà dotar-les d’un esturment que les facilite eth trabalh gràcies ad aguesta tecnologia e ath plaçament d’onze antenes de cobertura LORA per tota era Val d’Aran” afirme eth conselhèr Francés Bruna, en tot híger que “ei previst qu’aguesti colièrs siguen toti repartidi entara primauera, abans qu’eth bestiar torne tara montanha”. Aguestes antenes an estat aquesides a trauès de hons pròpris deth Conselh, subvencions deth Parc Nacionau o projèctes tecnologics de connexion satellitau damb era collaboracion de Hispasat e Arantec.
Es caps de bestiar que compden damb aguesti colièrs seran geolocalizadi en zònes enquiara remòtes, en tot facilitar atau eth trabalh dera ramaderia deth país, permetent-les era monitorizacion entath contròl deth bestiar e era prevencion d’atacs d’os.
“Eth govèrn deth Conselh Generau d’Aran amie a tèrme de hè lèu dus ans un procès de digitalizacion e innovacion en tot apostar per aplicar er Internet des Causes en diuèrsi sectors dera Val d’Aran”, afirmaue era sindica d’Aran, Maria Vergés, en tot híger que: “ath delà des facilitats entath sector ramadèr, era apliaccion dera tecnologia LORA mos pòt èster util entà diuèrses foncions coma eth contròl d’accèssi as ribères e d’auti punts de naut interès toristic, eth seguiment e monitorizacion de risqui naturaus coma lauegi, inondacions, huecs o estacions meteorologiques o ena proteccion civila, en tot crear punts de cobertura de secors o sensors de seguiment de persones en punts sense cobertura mobila, per exemple”.
En aguest sens, cau rebrembar qu’ara hè pògues setmanes, s’inaugurèc en Refugi dera Artiga de Lin eth punt de connexion satelitau que permet contactar damb era Sala de Contròtle de Pompièrs-Emergéncies de Casau, ua hita que permet melhorar era seguretat des persones en ua zòna fòrça transitada e qu’enquia ara demoraue incomunicada pr’amor dera manca de cobertura.
