Vielha, 08 d’abriu de 2016.- Eth Conselh Generau d’Aran damb era collaboracion d’Ecovidrio, a amiat a tèrme un an mès pendent es mesi de gèr, hereuèr e març, era campanha HRC (Ostalaria, Restauracion e Catering) de recuelhuda separada de veire ena Val d’Aran, damb uns resultats qu’an superat es dera campanha der an passat donques s’an arrecuelhut 205.716 Kg de veire.

Era campanha d’enguan s’a centrat enes establiments de restauracion dera Val d’Aran, e especiuaments es dera zòna deth Naut Aran e er airau de Baqueira Beret, entà conscienciar e fomentar entre eri era recuelhuda selectiva des envasi de veire generadi enes sues activitats.

Dempús de diuèrses visites personalizades a mès de 200 establiments se repartiren ferrats especifics adaptadi as besonhs de cada productor e s’an distribuït 40 iglós verdi modèl VACRI que faciliten eth voidat des contienedors des usatgèrs. A toti es establiments se les liurèc un adesiu dera campanha e un flyer informatiu damb era istòria e es curiositats deth reciclatge de veire.

Damb era fin d’estimular era participacion des empresaris dera ostalaria e era restauracion dera Val d’Aran ena recuelhuda selectiva des envasi de veire, Ecovidrio convidaue a participar as establiments en un concors sus abituds e formes de reciclar.

Es condicions entà optar as prèmis èren:

– Reciclar veire corrèctaments.

– Auer er adesiu en un lòc visible der establiment.

– Arténher ecopunts en tot arrespóner corrèctaments a un tèst sus era istòria deth reciclatge de veire includit en flyer liurat.

Finalament se verifiquèc qu’es establiments complissen damb es condicions entà optar ath prèmi e se realizèren eth tèst d’ecopunts.

Er establiment guanhador deth concors sus abituds e formes de reciclar a estat eth restaurant Casa Irene d’Arties. Eth prèmi a consistit en un viatge de quate dies entà dues persones, entàs proprietaris der establiment en Àustria, país modèl ena recuelhuda selectiva des residus e que presente uns percentatges de recuelhuda selectiva fòrça anautits; e 5 packs de sojorn rurau (Smart box) entàs trabalhadors der establiment.

En acte deth liurament deth prèmi ath restaurant Casa Irene, eth conselhèr de Territòri deth Conselh Generau d’Aran José Antonio Boya, a volut “arregraïr er esfòrç e era implicacion des empresaris e trabalhadors deth sector dera ostalaria e era restauracion dera Val d’Aran, e concrètaments enguan as establiments deth Naut Aran, per collaborar a trauès dera sua participacion en aguesta campanha de recuelhuda separada de veire ara mantenença dera Val d’Aran coma un país que respècte eth miei ambient e era natura, qu’ath madeish temps aufrís ua aufèrta ostalèra e de restauracion de grana qualitat”.

Finalament, cap arrebrembar qu’en an 2015 eth Conselh Generau d’Aran ja siguec distinguit pera Agéncia de Residus de Catalonha coma eth territòri damb melhor percentatge de recuelhuda separada de veire, pròp de 50 kg per abitant e an, e que damb era campanha qu’ara se barre eth Conselh Generau d’Aran, confie en seguir en tot melhorar aguesti percentatges, non solaments en çò que correspon ara fraccion de veire, mès tanben enes autes fraccions dera recuelhuda selectiva des residus municipaus.

Er an 2015 eth Conselh Generau d’Aran gestionèc separadaments 19,51% des residus generadi en territòri, çò que represente 3% mès sus era separacion de residus der an 2014.