• Pendent es dies 26 e 29 de gèr, sèt artistes d’art murau damb fòrça prestigi nacionau pintaràn es persianes baishades en Passeg deth Grauèr, era principau avenguda comerciau de Bossòst, entà transformar era imatge deth pòble. Aguesta actuacion vò èster ua apòsta per art a trauès deth concèpte de musèu a cèu dubèrt, entà dignificar aguesti espacis damb pintures que seguiràn era tematica des animaus e plantes autoctònes dera Val d’Aran.

Damb er objectiu de transformar era imatge de Bossòst e dinamizar era sua principau avenguda comerciau, eth Conselh Generau d’Aran, en collaboracion damb er Ajuntament de Bossòst, a impulsat er Hestivau “Eth Grauèr”, qu’aurà lòc pendent es dies 26 e 29 de gèr.

“Dempús de diuèrses amassades damb es comerciants deth municipi entà conéisher es sòns principaus besonhs e preocupacions, deth govèrn deth Conselh Generau d’Aran ençà decidírem amiar a tèrme ua accion conjunta damb er Ajuntament de Bossòst entà transformar era imatge deth passeg deth Grauèr, en tot dar vida a dotze persianes que, per inactivitat comerciau, s’an mantengut barrades fòrça ans, atau coma ua gran façada que forme part der Otèl Garona, espacis visibles dera carretèra N-230 ençà e que melhoraràn sustanciaument era imatge deth pòble” explicaue eth conselhèr d’Economia, Torisme e Promocion Economica, Juan Antonio Serrano.

Pera sua part, er alcalde de Bossòst, Amador Marqués, afirmaue que: “er Hestivau ‘Eth Grauèr’ vò èster ua apòsta per art a trauès deth concèpte musèu a cèu dubèrt entà dignificar aguesti espacis e transformar er aspècte de Bossòst damb ua sèrie de pintures que viraràn entorn ara tematica des animaus e plantes autoctònes dera Val d’Aran, pr’amor que, coma localitat rurau, Bossòst vò promòir eth valor incalculable dera fauna e flòra deth nòste territòri e, ath delà, profitant era proximitat d’Aran Park, eth projècte deth Grauèr vò èster un ligam damb aguest espaci, damb er objectiu qu’es visitants deth parc contunhen era sua visita toristica en Bossòst”.

Es artistes d’art murau seleccionadi entà pintar es persianes an artenhut popularitat en tot eth panorama nacionau d’art pr’amor dera sua mèrca personau, en tot crear cada un d’eri, un estil pròpri e diferenciat. En aguest sens, eth conselhèr d’Economia, Torisme e Promocion Economica, Josep Canut, destacaue que: “era amplia seleccion de pintors e pintores cerque balhar diuersitat artistica entà qu’es visitants poguen gaudir de diferenti estils mès tostemp laguens dera tematica comuna, era flòra e fauna d’Aran”.

Ath delà de poder gaudir der art e veir en viu coma se pinten aguesti muraus, pendent es quate dies der hestivau, se realizaràn tota sòrta d’activitats ludiques dubèrtes a tota era ciutadania.