• Dempús d’auer sollicitat en diuerses ocasions era dubertura dera termièra deth Portilhon, era sindica d’Aran e er alcalde de Bossòst an dirigit ua missiva ath Secretari d’Estat entara Union Europèa, en tot sollicitar ua mediacion damb es autoritats franceses entà arténher era dubertura d’aguesta via de manèra urgent e recuperar atau era dinamica de cooperacion e vesiatge entre Bossòst e Luchon

Era sindica d’Aran, Maria Vergés, e er alcalde de Bossòst, Amador Marqués, an dirigit ua missiva ath Secretari d’Estat entara Union Europèa, Juan González-Barba, en tot sollicitar era sua mediacion deuant des autoritats franceses corresponentes, dempús d’auer-les sollicitat, reiteradament e sense resultats, era dubertura deth Portilhon.

“Deth Conselh Generau d’Aran ençà entenem, qu’en marc actuau dera Union Europèa e sustot laguens der espaci Schengen, aguest barrament unilaterau per part der Estat Francès d’ua termièra ei insostenible e grèu entath dret ara mobilitat e era liure circulacion des ciutadans membres dera UE”, afirmaue era sindica d’Aran.

Pera sua part, er alcalde de Bossòst manifestaue que: “era termièra deth Portilhon ei un pas fòrça important entàs abitants d’Aran e deth parçan de Comminges, e especiaument entàs poblacions de Bossòst e Luchon, qu’auem de besonh aguesta via entà complementar servicis comerciaus, sanitaris, esportius o educatius, entre d’auti, e ei urgent recuperar era sua dinamica de cooperacion e vesiatge”.

Cau rebrembar qu’aguesta termièra siguec barrada eth passat mes de gèr per part der Estat Francés, en tot alegar motius d’alèrta terrorista. D’alavetz ençà, eth govèrn deth Conselh Generau d’Aran e er Ajuntament de Bossòst an insistit en besonh de restablir era normalitat transfronterèra en aguest tram, que constituís ua artèria d’accés dirècte qu’evite auer de recórrer 60 km per aute punt fronterèr mès pròplèu, eth de Pònt de Rei.