• Es gestions hètes per Ajuntament d’Es Bòrdes amassa damb eth Conselh Generau d’Aran an dat eth sòn frut e s’era climatologia ac permet es òbres ena ribèra der arriu Jueu (pònt deth Còc e en dic de Torrasa) començaràn era pròplèu setmana

Eth passat 12 de hereuèr eth sindic d’Aran, Carlos Barrera, e eth vicesindic prumèr d’Aran, Luís Carlos Medina, s’amassèren en Madrid damb era directora generau dera Aigua deth Ministerio de Agricultura, Alimentación y Medio Ambiente, Liana Ardiles, entà qu’era CHEBRO intervengue en retirar era grava deth pònt deth Còc e definir eth lhet der arriu Jueu entre eth pònt e eth dic de Torrasa, e abilitar eth dic ena mesura deth possible en tot garantir era sua foncionalitat. Aguesta serà era prumèra intervencion ena Val d’Aran dera CHEBRO der an 2015.

Ena ribèra der arriu Jueu contunhauen existint dus punts fòrça perilhosi: eth pònt deth Còc e eth dic de Torrasa. Eth pònt deth Còc auie vist redusida era sua capacitat peth pas dera aigua en un 75% e eth dic de Torrasa ei absolutaments saturat de grava.

En aguesta reünion eth sindic d’Aran, Carlos Barrera, e eth vicesindic d’Aran, Luís Carlos Medina, taben demanèren ara directora generau ua aportacion economica entara recuperacion deth camin reiau en Era Bordeta .

En paraules deth sindic d’Aran, Carlos Barrera, “es òbres deth pònt deth Còc son immediates e s’iniciaràn tan lèu era climatologia ac permete, demoram que pogue èster era setmana que ven (prumèra setmana deth mes de març)”.