• Aué s’a amiat a tèrme ua amassada entre era sindica d’Aran, er alcalde de Vielha e Mijaran e eth conselhèr de governacion damb eth director der ICGC e eth director generau de Politiques de Montanha e deth Litorau dera Generalitat entà tractar ahèrs relacionadi damb eth convèni entà implementar un hilat urban de heired e calor en Vielha

• Eth Conselh Generau d’Aran, per miei d’aguest projècte e deth plan de gestion forestau entar aprofitament dera biomassa, apòste peth foment des energies renovables, en tot trabalhar ena eliminacion dera peada de carbòni

Era sindica d’Aran, Maria Vergés, a recebut aguest maitin ena sedença deth Conselh Generau d’Aran ath director der Institut Cartografic e Geologic de Catalunya, Jaume Massó, damb qui a mantengut ua amassada entà parlar sus eth convèni entre andues institucions, qu’a coma objectiu prebotjar er usatge dera geotermia ena Val d’Aran.

En aguesta amassada an estat presents tanben eth conselhèr de Governacion, Amador Marqués, er alcalde de Vielha e Mijaran, Juan Antonio Serrano, eth director generau de Politiques de Montanha e deth Litorau dera Generalitat, Albert Alins, e tecnics especialistes deth Conselh Generau d’Aran e der ICGC.

Pendent aguesta amassada, s’an tractat ahèrs relacionadi damb es estudis e trabalhs d’enginheria que s’an de realizar entà impulsar eth projècte de climatizacion urbana de heired e calor “Vielha Smart Multi-RES micro DHC grid”, que darà cobertura diuèrsi equipaments e edificis de Vielha per miei d’ua ibridacion d’energia geotermica.

“Damb aguest projècte de hilats urbans de heired e calor dam un pas important en impuls des energies renovables entà disminuir er usatge e dependéncia des energies fossils e contribuir atau ara eliminacion dera peada de carbòni e trabalhar pera sostenibilitat” afirmaue era sindica d’Aran, Maria Vergés, en tot híger que: “ath delà d’aguest projècte de District Heating and Cooling, en aguesti moments, eth govèrn deth Conselh Generau ei a punt d’encetar es trabalhs forestaus que mos permeteran profitar es nòsti recorsi entà generar biomassa, ath viatge que suenham es nòsti bòsqui e les hèm mès resilients ath cambi climatic e as incendis forestaus”.

Eth projècte “Vielha Smart Multi-RES micro DHC grid” aufirà ara Val d’Aran diuèrsi beneficis, autant mieiambientaus coma sociaus e economics, en tot redusir es emissions de CO², artenhent ua major eficiéncia energetica e auaçant enquia ua major sostenibilidad en territòri.

Era geotermia ei un recors geologic e ua hònt d’energia renovable, neta e autoctòna, qu’amassa damb era rèsta d’energies renovables ajude a assolir un modèu energetic mès sostenible, basat ena eficiéncia energetica, er impuls der autoconsum, era reduccion des emissions de CO²  e era luta contra eth cambi climatic.