Eth dia 23 de noveme de 2007 se signèc un Acòrd marc entara promocion deth Plan Catalan “Espòrt ena Escòla” entre eth Conselh Generau d’Aran e eth Centre Educatiu IES ARAN, en vertut deth quau eth prumèr se comprometie a subvencionar annauments e d’ua forma parciau es activitats desvolopades des dera Associacion Esportiva Escolara (AEE) der IES d’Aran en marc deth Plan nomentat, cossent damb es disponibilitats pressupostàries existentes.

Eth Conselh de Govèrn aprovèc era Addenda 2012 ar acòrd marc entara promocion deth Plan Catalan “Espòrt ena escòla” entre eth Conselh Generau e eth Centre educatiu IES Aran signat eth dia 23 de noveme de 2007, en tot auer en compde qu’era adopcion d’aguest acòrd ei competéncia deth Conselh de Govèrn, en vertut des delegacions efectuades en aguesta matèria peth Conselh Generau d’Aran, en session plenària de 27 de junhsèga de 2011.

Eth vicesindic d’Aran, Luís Carlos Medina, e eth director der IES d’Aran, Manel Serrabona, an signat aguesta addenda entà pr’amor de definir eth marc de collaboracion entre ambdues entitats entath desvolopament deth Plan Catalan “Espòrt ena Escòla”.

En paraules del vicesindic Medina “damb aguest Plan se preten méter a disposicion de toti es escolans der IES d’Aran era practica der espòrt, e profitar eth gran potenciau d’aguestes activitats entà contribuïr ara formacion personau e civica des nòsti joeni”.

Eth Conselh Generau d’Aran aportarà era qüantitat de 1.500,00€ ara Associacion Esportiva Escolar (AEE) der IES ARAN entath finançament des activitats que se desvolopin en marc deth Plan Catalan “Espòrt ena Escòla”.