Vielha, 1 d’abriu de 2016.- Er Institut Català del Sol (INCASOL) e eth Conselh Generau d’Aran amiaràn a terme es òbres de restauracion dera cobèrta, vòlta e henedures dera glèisa de Sant Joan d’Arres. Era accion de restauracion, que se li calie auer produsit en an 2009 quan se signèc eth convèni de collaboracion e siguec post ponuda per fauta de disponibilitat pressupostària per part dera Generalitat de Catalonha, finalament s’amiarà a tèrme aguesta primauera.

Ajuntament d’Arres

Er an 2012 deuant era situacion de deteriorament dera cobèrta e era vòlta dera glèisa, eth Conselh Generau d’Aran, executèc era sua part deth convèni, damb ua inversion de 50.000€ entà garantir aguestes estructures qu’èren laguens d’un estat pro grèu.

Posterioraments, eth Conselh Generau d’Aran contunhèc en tot demanar era execucion deth rèste des òbres pendentes, e finalament, en data 30 de seteme de 2015, er INCASOL aprovèc ua naua addenda ath convèni de 2009 que hè possible era execucion des òbres restants. En aguest sens eth INCASOL a licitat es òbres dera dusau fasa de restauracion dera glèisa de Sant Joan d’Arres, per un impòrt de 84.709,23€ mès IVA, a fin de restaurar era cobèrta, vòlta e henedures dera glèisa.

Aguesta accion “ei frut dera insisténcia deth Conselh Generau d’Aran e der Ajuntament d’Arres, e garantirà era conservacion en bon estat d’un important element arquitectonic dera Val d’Aran, com ei era glèisa de Sant Joan d’Arres” a manifestat eth sindic d’Aran Carlos Barrera.

Eth sindic, tanben a volut méter de manifèst “era determinacion deth Departament de Territòri dera Generalitat, entà amiar a tèrme aguesta accion maugrat es grèus dificultats economiques que sofrís era Generalitat de Catalonha”.