Eth Conselh Generau d’Aran destine es sòs ar adquisicion de nau equipament entara residéncia geriatrica Sant Antòni dera Val d’Aran
Vielha, 23 de hereuèr de 2016.- Eth Conselh Generau d’Aran e era Fondacion bancària “La Caixa”, an signat un convèni qu’era entitat financèra autrege ara institucion aranesa era quantitat de 20.000€, entath finançament d’activitats e servicis de promocion e supòrt des servicis sociaus. Eth Conselh Generau d’Aran, destinarà es sòs ara adquisicion de nau equipament assistenciau entara residéncia geriatrica Sant Antòni dera Val d’Aran.
Eth convèni ac an signat eth sindic d’Aran Carlos Barrera, en representacion deth Conselh Generau d’Aran e Joaquim Macià, director territoriau dera banca d’institucions, en representacion dera Fondacion bancària “La Caixa”.
Eth nau materiau que compdarà damb eth era residéncia Sant Antòni, consistís en un sistèma de contraròtle de errants installat pera enterpresa Aran Seguretat, entà evitar que persones que patissen alzheimer gesquen en ua descuedada dera residéncia, ua liechòla de docha electrica, ua bascula digitau entà pesar persones en cagira d’arròdes, quate reposapès basculants, quate plateles ajustables Ergofact, un sobrematalàs e un matalàs antiescares, ua plataforma NeuronUP e cinc tablets.
Eth sindic d’Aran Carlos Barrera, destaquèc que “gràcies ara collaboracion contunhada damb era Fondacion bancària ” La Caixa “, eth Govèrn d’Aran pòt dar responsa a part des sues obligacions sociaus cap as persones, coma en aguest cas des persones granes”.
Pera sua part Joaquim Macià, director territoriau dera banca d’institucions dera Fondacion bancària “La Caixa”, didec que “son es clients es quaus hèn possible era Òbra Sociau qu’era entitat li destine ada eth cada an 500 milions d’èuros. Macià, tanben a explicat que contunharàn en tot crear projèctes conjunts damb eth Conselh Generau d’Aran”.
Era directora dera residéncia geriatrica Sant Antoni Erika Sanabria, ahigec que “damb aguest nau materiau poderàn atier a persones damb fòrça pòca mobilitat, gràcies ara liechòla de docha electrica, generar encara mès tranquillitat as familhes damb eth sistèma de contraròtle d’errants, o qu’era gent grana age tanben accès as naues tecnologies damb es tablets”, per méter sonque tres exemples.
