• Era sindica d’Aran acordèc era setmana passada damb eth secretari generau de Territòri dera Generalitat iniciar es trabalhs tà abordar de manèra conjunta es possibles melhores entara C-28 en sòn tram entre Vielha e Naut Aran e impulsar tanben ua Agenda de Mobilitat Sostenibla dera Val d’Aran que permete ath nòste territòri transitar tà un nau modèl de desvolopament mès sostenible e que tanben sigue un element potenciador dera nòsta economia

Era setmana passada, pendent era amassada mantenguda entre representants deth Conselh Generau d’Aran e eth departament de Politiques Digitaus e Territòri dera Generalitat, presidida pera sindica d’Aran, Maria Vergés, eth secretari generau de Vicepresidéncia, Politiques Digitaus e Territòri, Ricard Font, e eth secretari de Territòri e Mobilitat, Isidre Gavín, e que compdèc tanben damb era preséncia deth secretari Generau entath Rèpte Demografic, Francés Boya, e er alcalde de Naut Aran, César Ruiz Canela, s’acordèc iniciar es trabalhs entre Generalitat e Conselh Generau entà tractar ahèrs relacionadi damb era mobilitat en territòri, entre eri era melhora e adequacion dera carretèra C-28

“Er objectiu que compartim ei eth d’abordar de forma integrau era mobilitat dera Val d’Aran e, per tant, es possibles solucions entara C-28 en sòn tram de Vielha a Naut Aran e era sua connexion damb era N-230, mès tanben volem impulsar ua Agenda de Mobilitat deth territòri que mos permete transicionar a un nau modèl de desvolopament mès sostenible e que tanben sigue un element potenciador dera nòsta economia”, afirmaue era sindica d’Aran.

Pendent aguesta amassada, se manifestèc era volontat deth Conselh Generau e era Generalitat d’abordar es rèptes en matèria de mobilitat dera Val d’Aran e des problematiques dera C-28 de manèra conjunta, en tot trapar atau solucions a ua problematica istorica deth territòri, e hè’c de forma coordinada damb eth govèrn der Estat, damb qui ja s’a acordat, a trauès dera secretaria generau d’infraestructures, trabalhar ena melhora dera N-230.

Ena trobada se tractèc tanben sus es possibilitats en matèria de transpòrt public e er hilat ciclable dera Val d’Aran tà includi’c en aguesta prepausa de melhora dera C-28. En aguest sens, eth departament de territòri dera Generalitat amiarà a tèrme era contractacion d’un equip de supòrt tara redaccion d’aguesta agenda e des projèctes a impulsar.