• Eth conseller Puig e eth sindic d’Aran, Carlos Barrera, an signat un convèni de collaboracion entà dinamizar eth comèrç d’Aran, damb er objectiu de melhorar era competitivitat des empreses comerciaus e de servicis que i opèren en territòri.

Eth sindic d’Aran, Carlos Barrera, e conselhèr d’Empresa e Aucupacion dera Generalitat de Catalunya, Felip Puig, an signat un convèni de collaboracion entara dinamizacion deth comèrç dera Val d’Aran. Damb aguest acòrd, era Generalitat e eth Conselh Gerenau d’Aran formalizen era volontat d’ambdues administracions de trabalhar amassa en un plan d’accions entath 2014 qu’a per objectiu era melhora dera competitivitat des empreses comerciaus e de servicis qu’opèren en territòri aranés.

Damb aguest objectiu de melhorar era competitivitat deth sector comerciau aranés, eth plan d’accions 2014 preve ua seguida d’accions que contribuïsquen a adaptar era aufèrta as besonhs deth crompador, tant resident coma non resident, e a optimizar era prestacion deth servici.

Entre es accions previstes s’includissen accions de promocion e impuls deth comèrç e deth torisme, participacion en hèires, accions de fidelizacion -coma era tarja Val d’Aran Card-, e accions d’impuls deth comèrç transfronterèr damb campanhes de promocion en sud de França. Atau madeish, se preven accions eth collaboracion damb associacions comerciaus, impuls ara formacion pera melhora deth comèrç e dera artesania, aplicacions mobiles entath comèrç, e er impuls deth projècte de recuperacion dera artesania dera lan d’oelha aranesa, entre d’auti.

Aguest convèni a era volontat de repréner era cooperacion iniciada en 2004 e auançar en definitiu traspàs de competéncies en matèria de comèrç, que serà a compdar deth 2015. Eth plan d’accions 2014 compde damb un pressupòst totau de 85.000 èuros, qu’aportaràn ambdues administracions.