Vielha, 31 de març de 2017.- Eth Conselh Generau d’Aran e eth Conseil Départemental dera Haute Garonne meteràn en foncionament eth pròplèu 18 d’abriu eth servici de transpòrt public de viatgèrs entre era Val d’Aran e Comminges damb er objectiu de facilitar es desplaçaments des usatgèrs deth transpòrt public transfronterèr.

Er acòrd ath qu’an arribat ambdues administracions compde damb era participacion des dues enterpreses qu’aufrissen eth servici des linhes actuauments existentes en un e d’aute costat deth Pirenèu. En cas dera Val d’Aran era enterpresa ALSA e en cas francés era enterpresa EPTR.

Es oraris de conexión transfronterèra seràn es abituaus des linhes actuaus en cas dera Val d’Aran, des de Baqueira enquia Les, damb connexion enquia St. Gaudens per part dera companhia francesa.

Eth prètz deth bilhet simple serà eth madeish qu’enquia ara abonen es usatgèrs d’aguest servici laguens era Val d’Aran, qu’ei de 1,10 € peth trajècte entre Baqueira e Les. Eth prètz deth viatge enquia St. Gaudens serà de 2,20 €. Se mantieràn es oraris actuaus de deluns a diuendres.

Ambdues administracions estúdien quin serà eth servici que s’aufrirà pendent es dimenjades.

Era començada d’aguest servici ei entà dar responsa ara demanda des ciutadans d’establir ua linha de transpòrt public collectiu que permete desplaçar-se des dera region de Comminges enquiara Val d’Aran, coma auie ja existit a principis deth sègle passat damb eth tramvia qu’enlaçaue aguesti dus territòris.

Era intencion deth Governi d’Aran e deth Conseil Départemental dera Haute Garonne, ei qu’en un futur aguest servici de transpòrt connècte tanben des de St. Gaudens enquia Toulouse per tren.