Eth libre damb un prètz de 30€ se pòt aquerir en Musèu dera Val d’Aran en Vielha e en Sant Joan d’Arties

Vielha, 7 de deseme de 2018.- Eth Conselh Generau d’Aran a trauès deth departament d’Auviatge e eth Musèu dera Val d’Aran en collaboracion damb eth Institut d’Estudis Ilerdencs dera Deputacion de Lhèida e er Avescat d’Urgelh a editat eth libre “Aran Me Fecit” que ja se pòt aquerir en Musèu dera Val d’Aran en Vielha e en Sant Joan d’Arties a un prètz de 30 €.

Eth libre, qu’enes pròplèus setmanes tanben se trobarà enes libraries dera Val d’Aran, a estat publicat ath madeish temps qu’era exposicion que damb eth madeish nòm se pòt visitar en Sant Joan d’Arties enquiath 27 d’abriu der an pròplèu sus er Art Sacre aranés, organizada peth Conselh Generau d’Aran, amassa damb er Avescat d’Urgelh, eth Musèu dera Val d’Aran, era Escòla Superiora d’Arquitectura dera Universitat Rovira i Virgili e era Escòla Superiora d’Arquitectura dera Universitat Internacionau de Catalonha.

Eth libre e era exposicion Aran Me Fecit recuélhen per prumèr còp era planimetría, fotografies e documentacion sus 42 glèises e capèles araneses.

Aran Me Fecit que mòstre er estat actuau der auviatge Sacre aranés a estat coordinat per Elisa Ros Barbosa, responsable der Airau d’Auviatge Culturau deth Conselh Generau d’Aran e a compdat damb un comitat editoriau integrat per Jèp de Montoya, assessor de Cultura deth Conselh Generau d’Aran, Elisa Ros Barbosa, Mn. Josep Mª Mauri Prior, vicari generau der Avescat d’Urgelh, Josep Lluís Ginovart, catedratic dera Escòla Superiora d’Arquitectura dera Universitat Internacionau de Catalonha, Agustí Còsta, professor dera Escòla Superiora d’Arquitectura dera Universitat Rovira i Virgili, e es trabalhs des estudiants des ETSA dera UIC e era URV.

Era edicion deth libre conten es tèxtes introductorios der arquevesque d’Urgelh e copríncep d’Andòrra, Monsenhor Joan Enric Vives Sicilia e deth sindic d’Aran, Carlos Barrera e un mapa damb planimetría e fotografies damb detalhs des glèises dera Val d’Aran amassa damb articles de referéncia sus cadun des aspèctes der auviatge Sacre dera Val d’Aran des membres deth comitat editoriau e de destacadi especialistes mondiaus coma Serge Brunet, dera Universitat de Montpelhièr; Manuel Castiñeiras, dera Universitat Autonòma de Barcelona; e Howard Bradley, dera Universitat de Cambridge.

Eth libre ei publicat en lengua aranesa damb era revirada des articles ath catalan, castelhan, francés e anglés.