Vielha, 28 de seteme de 2018.- Eth Conselh Generau d’Aran a trauès deth SABS (Servici Aranés de Benéster e Salut) e en collaboracion damb era Federacion ALLEM, elaborarà un estudi entà melhorar era cartèra de servicis que s’aufrissen ena Val d’Aran as persones damb discapacitat intellectuau e malauties mentaus. Er estudi tanben servirà entà conéisher quines persones poderàn beneficiar-se damb aguesti servicis.

Atau ac a explicat era conselhèra de Salut e Benéster d’Aran, Anna Díaz, qu’a manifestat que s’estudiaràn quines son es possibilitats de generar activitats d’òci e tanben de trabalh, e quini an d’èster es recorsi sociaus que s’an de destinar entà arténher qu’aguestes persones poguen hèr era sua vida ena Val d’Aran damb plenitud e èster atengudi en tot moment.

Er estudi se harà amassa entre eth SABS e era Federacion ALLEM, damb qui eth Conselh Generau d’Aran desvolòpe eth Talher Ocupacionau ADDA damb er objectiu de dar responsa ad aqueres persones damb discapacitat intellectuau en edat laborau dera Val d’Aran que, pes sues caracteristiques non pòden accedir a un contracte de trabalh ne ath centre especiau de trabalh.

Era Federacion ALLEM ei ua agropacion d’entitats sociaus, sense ànim de lucre, dedicades ara prestacion de servicis de supòrt entàs persones damb discapacitat des Comarques de Lhèida.

Era Federacion ALLEM a era finalitat d’aufrir as persones en situacion de vulnerabilitat supòrts de qualitat; centradi en cada persona, adaptadi as besonhs e capacitats de cadun ath long dera vida; des dera proximitat, en tot mantier e en tot promòir era constitucion des servicis de besonh e contribuïr ara melhora contínua deth modèl de servicis de supòrt entàs persones damb discapacitat.