Vielha, 23 de junh de 2017.- Eth Conselh Generau d’Aran damb era collaboracion dera la Càtedra d’Estudis Occitans dera UdL e er Institut de Lengües dera Universitat de Lhèida, elaborarà eth projècte deth cors d’aranés nivèu “D”, damb era fin de desvolopar era capacitat d’expressar-se corrèctaments ena forma orau e escrita, çò que vò díder damb un mestratge complèt des nòrmes der aranés e des recorsi expressius (grafics e estilistics) d’un nivèu naut de formalitat.

Damb aguesta prepausa se cerque poder resòlver dobtes sus era nòrma der aranés que non an estat solucionadi enes nivèus anteriors der aprendissatge dera lengua, atau coma favorir era familiarizacion damb er occitan literari e era circonstància socioistorica der occitan. Eth projècte aportarà tanben er aprendissatge d’esturments d’analisi gramaticau (fonologica, morfologica, sintactica).

Eth responsable dera redaccion, causida e elaboracion des contenguts lingüistics e dera equipa encargada d’elaborar eth curriculum academic, ei Jordi Suïls Subirà, professor de lengua e sociolingüistica occitana dera UdL, membre dera Càtedra d’Estudis Occitans e der Institut d’Estudis Aranesi.
Es contenguts deth cors an de servir tanben entà esclarir cèrtes contradiccions enes opcions grafiques e era sua descripcion, e entà dar mès importància ara oralitat.