• Entre es accions de promocion e normalizacion dera lengua qu’amie a tèrme eth govèrn d’Aran, se trape era collaboracion damb era Delegacion deth Govèrn dera Generalitat en Madrid, era Universitat de Barcelona (UB) e eth Parlament de Catalonha entà aufrir as persones interessades corsi d’aranés en Madrid e Barcelona

 Enguan, en collaboracion damb eth Conselh Generau d’Aran, era Delegacion deth Govèrn dera Generalitat de Catalonha en Madrid incorpòre, per prumèr viatge, un cors d’aranés de 60 ores de nivèu basic, dubèrt a tota era ciutadanetat, que se realize en Centre Cultural Blanquerna. Eth cors, damb un detzenat de persones inscrites, l’ensenhe era professora Marta Moreno.

Ena Universitat de Barcelona ja se hec er an passat un cors d’introduccion ar aranés e enguan se repetís eth nivèu A1, que l’ensenharà Ferriol Macip, e se complemente damb un aute cors deth nivèu A2, damb Joan Carabias coma professor. En totau, i a un vintenat de persones inscrites. Tanben en Barcelona, eth Parlament de Catalonha aufrís un cors presenciau d’aranés de 60 ores de nivèu basic entath sòn personau e tàs deputats e deputades.

Toti es corsi an eth supòrt deth Conselh Generau d’Aran, qu’a fornit eth materiau pedagogic entàs diferenti nivèus, a seleccionat ath professorat e certificarà oficiaument es títols corresponents.