• A trauès d’activitats coma charrades pedagogiques enes escòles e visites tar Archiu Generau d’Aran entà consultar er Hons Sandaran, proposades peth Departament de Cultura e Lengua deth Conselh Generau d’Aran amassa damb eth Centre de Recorsi Pedagogics, se vò hèr a conéisher era vida e òbra de Josep Sandaran Bacaria, figura subergessenta dera lengua e cultura araneses

• Aguestes accions encara s’includissen laguens des activitats previstes en motiu der An Sandaran, declarat peth Plen deth Conselh Generau d’Aran en 2022, entà commemorar eth 80 aniversari dera mòrt d’aguest insigne aranés

Eth Conselh Generau d’Aran, a trauès deth sòn Departament de Cultura e Lengua, aufrís charrades pedagogiques tàs escolans des centres educatius deth nòste territòri, atau coma visites tar Archiu Generau d’Aran entà consultar er Hons Sandaran, entà hèr a conéisher atau era vida e era òbra de Josep Sandaran Bacaria, hilh de Canejan que viuec lèu tota era vida en Barcelona, a on hec amistat damb intellectuaus deth nivèu de Josep Carner, entre d’auti, e dediquèc fòrça temps a trabalhar per aranés e tà hèr a conéisher era realitat aranesa.

“Aguestes charrades e visites tar Archiu s’inclodissen encara en marc des activitats previstes pera maxima institucion aranesa damb motiu der An Sandaran, declarat deth Conselh Generau d’Aran ençà en 2022 entà commemorar eth 80 aniversari dera sua mòrt”, afirmaue era sindica d’Aran, en tot híger que: “a trauès d’aguestes accions, volem méter en valor era sua vida e òbra e apropar eth sòn legat ar escolanat des nòsti centres educatius”.

Peth moment, es prumèrs qu’an participat ena activitat, impartida pes tecniques de Lengua deth Conselh Generau d’Aran, Manuela Ané e Verònica Barès, an estat es estudiants des cicles miei e superior dera Escòla Sant Ròc de Bossòst, e es alumnes de quatau, cincau e siesau dera Escòla Alejandro Casona de Les.