• Er objectiu d’aguestes charrades, que s’an impartit ar alumnat de 2au d’ESO, e dera formacion en aguest airau entath professorat, EAP e tecniques de Joenessa deth Conselh Generau d’Aran, ei melhorar era deteccion des problematiques en salut mentau e emocionau, alfabetizar ena matèria e aufrir esturments entà melhorar es intervencions laguens d’aguest encastre

Eth Conselh Generau d’Aran, a trauès dera sua Oficina de Joenessa, a amiat a tèrme quate talhèrs de salut mentau e emocionau adreçades ar alumnat de 2au d’ESO der Institut d’Aran. Ath delà, s’a realizat tanben ua formacion entath professorat, EAP e tecniques de Joenessa en aguest airau.

Pr’amor dera crisi sanitària dera covid, eth collectiu adolescent e juvenil a patit un deteriorament generalizat dera sua salut mentau e emocionau. Conscient d’aguesta problematica, eth govèrn d’Aran, per miei dera empresa Aimentia Healt Tech a volut dar supòrt ar Institut d’Aran damb un projècte pionèr qu’a coma objectiu melhorar era deteccion des problematiques de salut mentau, alfabetizar ena matèria e aufrir esturments entà melhorar es intervencions en aguest encastre.

Hè ans qu’era Organizacion Mondiau dera Salut (OMS) manifèste eth besonh d’actuar en encastre dera salut mentau e emocionau dera poblacion. Pes caracteristiques dera sua etapa evolutiva, eth collectiu juvenil ei un des mès vulnerables. En Catalonha, s’estime qu’entre eth 10 e 20% des adolescents patissen bèth transtorn mentau, e eth suicidi ei dejà era prumèra causa de mòrt non naturau entre es persones joenes.

“Deth Conselh Generau d’Aran ençà consideram imperatiu e dejà trabalham entà impulsar actuacions qu’agen era capacitat de previer, protegir e prebotjar era salut mentau, dera madeisha manèra qu’ac hèm damb era salut fisica, afectiva, sexuau e reproductiva” afirmaue era sindica d’Aran, Maria Vergés.